काठमाडौँ–अख्तियार दुरुपयोग अनुसन्धान आयोगले प्रहरी नायब उपरीक्षक बाबुराम अधिकारीको शैक्षिक योग्यताको प्रमाणपत्र नक्कली रहेको अभियोगमा विशेष अदालतमा आज मुद्दा दायर गरेको छ ।
 
    अधिकारीको शैक्षिक योग्यताको प्रमाणपत्र नक्कली रहेको भनी परेको उजुरीमाथि छानबिन गर्दा प्रविणता प्रमाणपत्र तहको शैक्षिक योग्यता नक्कली रहेको पाइएको आयोगले जनाएको छ । आरोपी अधिकारीलाई कारवाहीको माग गर्दै विशेष अदालतमा मुद्दा दायर गरिएको प्रवक्ता प्रदीपकुमार कोइरालाले जानकारी दिए । 
 
    यस्तै आयोगले मालपोत कार्यालय रूपन्देहीका तामेली शाखामा कार्यरत कार्यालय सहयोगी जोगेन्द्रप्रसाद चौधरीविरुद्ध पनि विशेष अदालतमा मुद्दा दायर गरेको छ । 

एक सेवाग्राहीले निवेदनमार्फत सुकुम्वासी समस्या समाधान आयोगको निर्णय प्रतिलिपि माग गरेकामा सोसम्बन्धी मिसिल खोजी प्रतिलिपि उपलब्ध गराउने प्रयोजनमा कार्यालय सहयोगी चौधरीले रु २० हजार घुस  लिएको आरोप लागेको छ ।
 
    त्यस्तै आयोगले जिल्ला मालपोत कार्यालय, सिमराका कार्यालय प्रमुख मदनप्रसाद गुप्ता र लेखापाल युगलकिशोर ठाकुरसहित तीन जनाविरुद्ध विशेष अदालतमा मुद्दा दायर गरेको छ । सरकारी राजश्व हिनामिना गरेको अभियोगमा उनीहरु विरुद्ध मुद्दा दायर गरिएको हो ।

 सरकारी खातामा जम्मा गर्नुपर्ने रु चार करोड ५८ लाख ७१ हजार २० दाखिला नगरी व्यक्तिगत खातामा राखेको र सो कार्यमा कार्यालय प्रमुख गुप्ता, लेखापाल ठाकुर र नायब सुब्बा शत्रुधन राउतको मिलीभगत देखिएको आयोगले जनाएको छ ।  

यसैबीच रुकुममा  एक फरार प्रतिवादी २८ वर्षपछि पक्राउ परेका छन् । कर्तव्य ज्यान मुद्दामा जिल्ला अदालत रुकुमले विसं २०४८ वैशाख ९ गते नौ वर्ष सात महीना सात दिन कैद सजाय सुनाएका ६० वर्षीय मनवीर कामीलाई प्रहरीले २८ वर्षपछि पक्राउ गरेको हो । 

सानीभेरी गाउँपालिका–४ गरायलाका कामीलाई आठबीसकोट नगरपालिका–१४ घेत्मामा परिचय लुकाइ बसिरहेको अवस्थामा पक्राउ गरिएको जिल्ला प्रहरी कार्यालयका प्रहरी नायब उपरीक्षक सुमित खड्काले जानकारी दिए ।