काठमाडौँ - प्रमुख प्रतिपक्षी दल नेपाली कांग्रेसले नर्सहरूले पेशागत हक, हितको संरक्षण तथा न्यूनतम सेवा सुविधाको माग राखेर गरेको संघर्षका कार्यक्रममा सरकार उदासीन भएको आरोप लगाएको छ । आइतवार एक विज्ञप्ति जारी गरी कांग्रेसले अनसनमा बसेका नर्सको माग पूरा गर्न सरकारलाई आग्रह गरेको छ ।

'स्वास्थ्य क्षेत्रमा कार्यरत नर्सहरुले आफ्नो पेशागत हक, हितको संरक्षण, न्यूनतम सेवा तथा सुविधाको माग राखी संघर्षको कार्यक्रम गरेको आज दशौँ दिन वितिसक्दा पनि राज्यले देखाएको उदासिनताप्रति नेपाली कांग्रेसको गम्भीर ध्यान आकृष्ट भएको छ,' विज्ञप्तिमा उल्लेख छ, 'अनसनमा बसेका नर्सहरुको स्वास्थ्य स्थिति बिग्रदै गएको तर्फ समेत राज्य गम्भीर नदेखिनु दुःखद विषय हो ।'

कांग्रेसले यथाशीघ्र वार्ता र संवादको माध्यमबाट समस्याको निकास खोज्न नेपाली कांग्रेस सरकारलाई आग्रह गरेको छ ।

भक्तपुरस्थित शहीद धर्मभक्त राष्ट्रिय प्रत्यारोपण केन्द्रका नर्सहरुले १० दिन अघिदेखि आमरण अनशन शुरु गरेका थिए । विभिन्न माग राख्दै आन्दोलन शुरु गरेको १६औँ दिनसम्म पनि नर्सहरुको माग सम्बोधन नगरेको र उल्टै प्रहरी बोलाएर यातना दिएको भन्दै दुई जना नर्सले आमरण शुरु गरेका हुन् ।

सिनियर नर्स जीता बराल गत वैशाख २७ शुक्रबार दिउँसो २ बजे देखि नर्सिङ संघको केन्द्रीय कार्यालयमा अनसन बस्दै आइरहेकी थिइन् । स्वास्थ्यमा समस्या आएपछि उपचारको लागि बसुन्धारास्थित बीपी स्मृति अस्पतालमा उनलाई लगियो । बरालसँगै दबाबस्वरुप प्रत्यारोपण केन्द्रमै नर्स डिक्की शेर्पाले अनसन सुरु गरिन् । बराल र शेर्पा दश दिनदेखि अनसनरत छन् । 

उनीहरूले प्रत्यारोपण केन्द्रका नर्सहरूलाई समयमै तलब दिनुपर्ने, ठेकेदार प्रक्रिया हटाई कार्यरत सम्पूर्ण कर्मचारीहरुलाई अस्पतालले नै तलबको व्यवस्था गर्नुपर्ने, सरकारी अस्पतालमा पाइने सेवा सुविधा उपलब्ध गराउनुपर्ने, पुरानो कर्मचारीको कार्यसम्पादन मूल्याङ्कनका आधारमा ग्रेडिङ गरिनुपर्ने र पुराना कर्मचारीलाई स्थायी गरिनुपर्ने लगायतका माग राख्दै आएका छन् ।