काठमाडौं– प्रहरी महानिरीक्षक सर्वेन्द्र खनालले हरेक प्रहरी कर्मचारीले आफूले गरेको कामप्रति राष्ट्र, समाज, परिवार र आफैंले गर्व महसूस गर्न सक्ने गरी काम गर्नुपर्ने बताएका छन् ।

महानगरीय प्रहरी परिसर मातहतका जुनियर प्रहरी अधिकृत तथा प्रहरी जवानहरूलाई नेपाल पुलिस क्लब भृकुटीमण्डपमा बिहीवार सम्बोधन गर्दै महानिरीक्षक खनालले सो कुरा बताएका हुन् । 

संगठनको हालको रणनीति कस्तो छ र प्रहरीले कसरी काम गर्ने भन्ने विषयमा छलफल गर्न तथा राजधानीको सुरक्षा व्यवस्थालाई नमुना रूपमा विकास गरी थप प्रतिफल प्राप्त गर्न निर्देशन दिएको खनालले बताए । 

उनले हरेक प्रहरी कर्मचारीले संगठनको सोच र नागरिकको अपेक्षाअनुसार काम गर्नुपर्ने चर्चा गर्दै समुदाय–प्रहरी साझेदारी कार्यक्रम मार्फत नागरीकसँग समन्वय गरेर काम गर्नुपर्ने बताए । 

राजधानीमा आउन सक्ने विषम परिस्थितलाई कुनै पनि त्रुटी हुन नदिइ उचित ढंगले समाधान गर्नुपर्ने भएकोले कानून कार्यान्वयनमा कठोरता र विवेकपूर्ण निर्ममता अपनाएर उच्च मनोबलका साथ काम गर्न खनालले प्रहरी कर्मचारीहरूलाई निर्देशन दिए । 

विशिष्ट व्यक्तिको सुरक्षा, सडक सुरक्षा तथा नागरिकसँग प्रत्यक्ष सहकार्य गर्ने प्रहरी स्मार्ट हुनुपर्ने भएकोले बोली, वचन, व्यवहार लगायत क्रियाकलाप स्मार्ट, चुस्त, दुरुस्त र नमुनायोग्य हुनुपर्नेमा महानिरीक्षक खनालले जोड दिए ।