काठमाडौं – शुक्रवार ७ करोड ६७ लाख ९४ हजार नक्कली भारतीय नोटसहित युनुस अन्सारी पक्राउ परेका छन् ।

कतारको दोहाबाट २ सुटकेसमा ७ करोड ६७ लाख ९४ हजार रुपैयाँ नक्कली भारतीय नोट लिएर आएका पाकिस्तानी नागरिक उद्धिन नासिर, अनवर नासिर र अख्तर महोम्दलाई भेट्न त्रिभुवन अन्तर्राष्ट्रिय विमानस्थल पुगेको समयमा प्रहरीले पक्राउ गरेको हो ।

युनुस अन्सारी अहिले मात्रै पक्राउ परेका होइनन्, उनी विगतमा पनि नक्कली नोट कारोबारमा दोषी देखिएर जेल सजाय भोगिसकेका व्यक्ति हुन् । युनुसलाई ‘कुख्यात’ नक्कली नोट कारोबारीको रुपमा चिनिन्छ ।

यसअघि उनलाई प्रहरीको विशेष व्यूरोले २०६५ पुस १८ गते ललितपुरको नख्खुस्थित उनकै घरबाट पक्राउ गरेको थियो । पक्राउ परेको २ वर्षपछि जेलमा रहेका बेला २०६७ फागुन २६ गते सुन्धारास्थित केन्द्रीय कारागारको गेटमै उनीमाथि गोली प्रहार गरिएको थियो । 

३ वर्ष ९ महिना कारागार भुक्तान गरेका अन्सारी दोस्रो पटक २०६६ पुस ७ गते थापाथलीस्थित ब्लू स्टार कम्प्लेक्सको कोठा नम्बर ६११ बाट २५ लाख ४४ हजार ५ सय नक्कली भारतीय रुपैयाँ र ३ किलो ७ सय ग्राम खैरो हेरोइनसहित पक्राउ परेका थिए । उनलाई जाली नोट कारोबार र अवैध लागूऔषध कारोबारको अभियोगमा फेरि कारागार चलान गरिएको थियो ।

उनी नक्कली नोट कारोबारमा पटक–पटक पक्राउ गर्दै जेल पर्दै फेरि पुरानै कारोबारमा फर्किने गरेको देखिएको छ । उनी नक्कली नोटसहित पक्राउ परेको यो तेस्रो पटक हो । नक्कली नोट कारोबार अपराध सम्बन्धमा मुलुकी अपराध (संहिता) ऐन २०७४ को दफा २५७ को उपदफा २ मा ‘खोटा मुद्रा’ अर्थात् नक्कली मुद्रा कारोबार ‘गर्ने वा गराउने व्यक्तिलाई ७ वर्षसम्म कैद र ७० हजार रुपैयाँसम्म जरिवाना हुने’ भनिएको छ ।

अभियुक्त युनुस अन्सारी जेल सजाय भुक्तान गरी १ वर्षअघि २०७४ चैत २ गते छुटेका थिए । नेसनल टेलिभिजन समेत चलाउँदै आएका अन्सारी जेलमा हुँदा भारतीय अपराधी जसजित सिंहले गोली प्रहार गरेका थिए । युनुसलाई पाकिस्तानी खुफिया एजेन्सीसँग सम्बन्ध रहेको आरोप लाग्दै आएको छ ।

अन्सारीकी बहिनी उषाकिरण पहिलो संविधान सभाको निर्वाचनमा माओवादीको तर्फबाट समानुपातिक सभासद् थिइन् भने पूर्वमन्त्री स्व. सलिममिया अन्सारी उनका बुवा हुन् ।

कतारबाट काठमाडौं पुर्‍याइएको सुटकेसमा साढे ७ करोड बढी ‘नक्कली’ भारतीय नोट

दुई सुटकेस नक्कली भारुसहित ३ पाकिस्तानी नागरिक त्रिभुवन विमानस्थलबाट पक्राउ