काठमाडौं – धितोपत्र बजारमा यस साता शेयर कारोबार मापक नेप्से परिसूचक उतारचढावपूर्ण अवस्थामा रह्यो ।

शुरूका केही दिन ओरालो लागेको नेप्से साताको अन्तिम तिर आइपुग्दा उकालो लाग्ने संकेत गर्‍यो । यद्यपी कारोवार रकममा भने उल्लेख्य वृद्धि हुन सकेन ।

नेपाल स्टक एक्सचेञ्जका अनुसार कूल १७४ कम्पनीका ६४ लाख ३० हजार ८४ कित्ता शेयर १ अर्ब ९१ करोड ४९ लाख ७५ हजार ११२ मूल्यमा खरीद बिक्री भए । गत बिहीबार अर्थात जेठ ३० गते एक हजार २६९.५५ बिन्दुमा पुगेर कारोवार बन्द भएको नेप्से यस साताको शुरूको दिन अर्थात असार १ गते आइतबार  ११.३६ बिन्दुले घटेर १ हजार २५८.२७ मा झर्‍यो । 

कूल १७४ कम्पनीका १४ लाख ७३ हजार ८०८ कित्ता शेयर ४७ करोड २५ लाख २० हजार ८ सय ११ रुपैयाँमा खरीद बिक्री भए । निरन्तर ओरालो लाग्दै आएको  नेप्से परिसूचक सोमबार भने सामान्य सुधार देखियो । सो दिन नेप्से परिसूचक २.६३ बिन्दुले वृद्धि भई १ हजार २६०.९० अंकमा पुग्यो ।  कूल १७३ कम्पनीका १३ लाख ७३ हजार १३० कित्ता शेयर ४० करोड ३५ लाख ३८ हजार १ सय ४७ रुपैयाँमा खरीद बिक्री भए । स्टकका अनुसार कूल ११ उपसमूहको कारोवार भएकामा आज तीन उपसमूहको शेयर घटेको छ भने ८ उपसमूहको शेयर बढ्यो ।

मंगलबार भने कारोवार मापक नेप्से परिसूचक पुनः ओरालो लाग्यो ।  सो दिन परिसूचक २.२३ बिन्दुले घटेर एक हजार २५६.६६ बिन्दुमा पग्यो । घटेको बजारमा कारोवार रकममा पनि गिरावट आयो । कूल १ सय ७७ कम्पनीका १२ लाख २६ हजार ६८६ कित्ता शेयर ३५ करोड ९४ लाख ११ हजार ३ सय ५ रुपैयाँ मूल्यमा कारोबार भयो । स्टकका अनुसार कारोबार भएका कबुल ११ उपसमूहमध्ये शनिवार ३ उपसमूहको मात्रै शेयरमा वृद्धि भयो । 

साताको शुरूआतदेखि नै अस्थिर रहेको धितोपत्र बजारमा नेप्से परिसूचक बुधबार पुनः ओरालो लाग्यो । परिसूचक ०.२० बिन्दुले घटेर एक हजार २५८.४६ अंकमा पुग्यो । टकका अनुसार शनिवार १६९ कम्पनीका नौ लाख ८० हजार ९१९ कित्ता शेयर ३० करोड ४१ लाख ८९ हजार ६ सय ४५ रुपैयाँमा खरीद बिक्री भए । 

साताको अन्तिम दिन भने परिसूचक उकालो लागि बन्द भयो ।  सो दिन परिसूचक ५.९० अंकले बढेर एक हजार २६४.३६ बिन्दुमा पुग्यो । परिसूचक उकालो लागेपनि कारोबार रकम भने सस्तैमा समेटियो । कूल १ सय ७१ कम्पनीका १३ लाख ७५ हजार ५४१ कित्ता शेयर ३७ करोड ५३ लाख १५ हजार २ सय ४ रुपैयाँमा खरीद बिक्री भए । 

३ कम्पनीका शेयर सूचीकृत

नेपाल स्टक एक्सचेञ्ज लिमिटेडमा बिहीवार विभिन्न ३ कम्पनीका शेयर सूचीकृत भएका छन् । मेरो माइक्रोफाइनान्स वित्तीय संस्थाको ३२ लाख ८९ हजार कित्ता हकप्रद शेयर सूचीकृत भएको छ । मिथिला लघुवित्त वित्तीय संस्थाका ३ लाख २९ हजार ८ सय ८९ कित्ता हकप्रद शेयर सूचीकृत भए ।  स्टकमा जेविल्स फाइनान्स लिमिटेडका ३ लाख ४० हजार ९ सय ५५ कित्ता हकप्रद र ३ लाख ८९ हजार २ सय ८१ कित्ता शेयर लाभांश सूचीकृत भएको छ ।