काठमाडौं– संघीय मामिला तथा सामान्य प्रशासनमन्त्री लालबाबु पण्डितले स्थानीय तहमा पदपूर्तिका लागि गरिएको विज्ञापन संविधान र प्रचलित कानूनबमोजिम नै रहेको दाबी गरेका छन् ।

विनियोजन विधेयकमाथि सांसदहरूले उठाएका प्रश्नको जवाफ दिने क्रममा प्रतिनिधि सभाको आइतवारको बैठकमा मन्त्री पण्डितले उक्त कुरा बताएका हुन् ।

'स्थानीय तहमा पदपूर्तिका लागि गरिएको विज्ञापन संविधान तथा प्रचलित कानूनबमोजिम भएको र लोक सेवा आयोगले नै स्वतन्त्र संवैधानिक निकायको हिसाबले आफ्नो मुख्य जिम्मेवारी कानूनसम्मत् र निष्पक्षताका साथ पूरा गर्ने सरकारको विश्वास छ,' उनले भने ।

मन्त्री पण्डितले कर्मचारीहरूलाई क्षमता र योग्यताको आधारमा नै जिम्मेवारी दिने गरिएको बताए ।

'नातावाद कृपावादको कुनै गुञ्जायास छैन,' मन्त्री पण्डितले भने, 'कर्मचारीको क्षमता र योग्यताका आधारमा नै जिम्मेवारी दिने गरिएको छ ।'