काठमाडौं – विनियोजन विधेयकमाथि सांसदहरूले उठाएका प्रश्नको जवाफ दिएपछि कानूनमन्त्री भानुभक्त ढकाललाई नेमकिपा सांसद प्रेम सुवालले प्रश्न गरे– ‘जिल्ला अदालत काठमाडौंका पाँचलाख घुस खाएका न्यायाधीशलाई न्यायपरिषद्ले सचेत मात्र गराएर क्लिन चिट दिएको कुरा सुनिन्छ के हो ?’

जवाफमा मन्त्री ढकालले भने– ‘काठमाडौंका न्यायाधीशले पाँच लाख घुस खाएको बारे छानबिन प्रक्रिया प्रष्टिकरणको चरण छ । अरूले उनको संलग्नता छ भन्ने कुरा गरेपनि, उनले त्यो कुरा स्वीकार नगर्नुभएको अवस्था छ,’ मन्त्री ढकालले भने, ‘आयोगको प्रतिवेदनले पूर्णता दिन नसकेको र प्रष्टीकरणको माध्यमबाट त्यो प्रक्रियामा गएको साँचो हो ।’

मुद्दा मिलाउने भन्दै जिल्ला अदालत काठमाडौंका न्यायाधीश बाबुकाजी बानियाँले ५ लाख घुस लिएको आरोपमा न्यायपरिषद्ले छानबिन गरिरहेको छ । पक्राउ परेका अदालतका नासु भोलानाथ चालिसेले न्यायाधीशको निर्देशनमा आफूले घुस बुझेको अख्तियारलाई बयान दिएका थिए । 

सांसद सुवालले मन्त्रीसँग अर्को पनि प्रश्न गरेका थिए– ‘न्यायालय माफियाको घेरामा रहेको जनगुनासो छ, तपाईंको आँखामा न्यायाधीश माफियामुक्त छन् ?’ 

मन्त्री ढकालले जवाफ दिए– ‘बाहिरबाट हेरेजस्तो मात्र पनि छैन, न्यायालय छैन, अपवादमा कोही मान्छे गलत छैन भन्ने पनि छैन । तर अपवादलाई बनाएर सिंगो न्यायपालिका त्यही हो भन्ने दृष्टिकोण न्यायपूर्ण हुँदैन कि ?’
सांसद सुवालको तेस्रो प्रश्न थियो– ‘सत्य निरूपण र मेलमिलापको नाममा गम्भीर मानवअधिकार उल्लंघनका घटनामा माफी दिन मिल्छ ?’  

मन्त्री ढकालले जवाफ दिए– ‘सत्य निरूपण र मेलमिलापको पूर्णताको नजिक छ, यसलाई पूर्णतामा पुर्‍याउन मन्त्रालय क्रियाशील छ । १२/ १३ वर्षसम्म समस्या नभएकोले विश्वास नलागेको हुन्छ । परिणामले पुष्टि गर्नका लागि सरकार क्रियाशील छ ।’