काठमाडौं – राज्यको उच्च ओहोदामा बसेकाहरू स्वास्थ्य उपचारका लागि विदेश गएपनि सर्वसाधारणको पहुँचमा स्वास्थ्य उपचार नपुगेको भन्दै सरकारसँग सांसदले जवाफ माग गरेका छन् । 

सांसदले सरकारी अस्पतालको अबस्था नाजुक रहेको भन्दै यसको सुधारतर्फ सरकारको ध्यानाकर्षण गराएका हुन् । 

प्रतिनिधि सभामा विनियोजन विधेयक अन्तर्गत स्वास्थ्य मन्त्रालयसँग सम्बन्धित प्रश्नको जवाफ दिनेक्रममा स्वास्थ्य तथा उपप्रधानमन्त्री उपेन्द्र यादवसँग सांसदले सरकारी अस्पतालको सुधार गर्न माग गरेका हुन् । 

‘सरकारमा गएका नेताहरू दिल्ली, अमेरिका र सिंगापुर उपचार गर्न जाने, सर्वसाधारण नेपालीको नेपालमा पनि उपचार नहुने, विगतको सरकारमा भन्दा यो के फरक भयो ?’ नेमकिपा सांसद प्रेम सुवालले प्रश्न गरे, ‘नेपालका निजी अस्पतालले अन्तर्राष्ट्रियस्तरको उपचार दिने दाबी गर्न सक्ने, नेपाल सरकारले कुनै पनि अस्पतालमा अन्तर्राष्ट्रिय स्तरको उपचार छ भन्न नसक्ने किन ?’

जवाफमा मन्त्री यादवले विदेशमा उपचार गर्न जानेलाई राज्य कोषबाट खर्च दिने व्यवस्था नरहेको स्पष्ट गरे । ‘विदेशमा उपचार गर्नको लागि हामीले नै यही सदनबाट ऐन पारित गरेका छौं । कसैलाई पनि विदेशमा उपचार गर्नको लागि सरकारी कोषबाट खर्च दिने छैन । चाहे सामान्य जनता या जोसुकै होस्,’ मन्त्री यादवले भने, ‘सबैका लागि यो कानून लागू भइसकेको छ, पैसा भएकोलाई विदेशमा उपचार गर्न जान रोक्न सक्ने कानून र व्यवस्था छैन ।’

मन्त्री यादवले जटिल प्रकारका शल्यक्रिया पनि नेपालमै सम्भव हुने गरेको भन्दै नेपालीहरू उपचारका लागि विदेश जानुपर्ने अवस्थाको अन्त्य भएको दाबी गरे ।

‘नेपालमा धेरै खालका रोगको उपचार सम्भव भइसकेको छ, किड्नी ट्रान्सप्लान्टट, न्यूरो या हार्ट सर्जरी नेपालमै सम्भव छ । हामी यही उपचार गराउ, म पनि विदेश जान्न,’ मन्त्री यादवले भने ।