काठमाडौं–सशस्त्र द्वन्द्वको समयमा बढाइएको नेपाली सेनाको संख्या घटाउने कुरामा गम्भीर विश्लेषण गरेर मात्र निष्कर्षमा पुग्नुपर्ने उपप्रधान एवं रक्षामन्त्री ईश्वर पोखरेलले बताएका छन् । 

विनियोजन विधेयकमाथि सांसदहरूले उठाएका प्रश्नको मंगलवार जवाफ दिने क्रममा मन्त्री पोखरेलले कुशल र दक्ष सैनिक तयार गर्ने कुरा छोटो समयमा हुन नसक्ने कुरालाई समेत दृष्टिगत गर्नुपर्ने बताएका हुन् । 

‘विगतको सशस्त्र द्वन्द्वको समाप्त भएको १३ वर्ष व्यतित भइसकेको सन्दर्भमा तत्कालीन परिस्थितिमा बढाइएको सेनाको संख्या अहिले घटाउन आवश्यक छ कि भन्ने प्रश्न माननीयहरूले उठाउनुभएको छ,’ मन्त्री पोखरेलले जवाफमा भने, ‘मुलुकको बढ्दो सुरक्षा चुनौती, अपराधका घटनामा आएका विविधता, प्राकृतिक तथा मानवीय दुर्घटनामा भइरहेको दिनानुदिन वृद्धि र कतिपय ठूला र रणनीतिक महत्त्वका पूर्वाधारमा समेत सेनालाई संलग्न गराउनु पर्ने आवश्यकता छ । कुशल र दक्ष सैनिक तयार छोटो समयमा हुन नसक्ने कुरालाई समेत दृष्टिगत गरी सेनाको संख्यालाई गम्भीर विश्लेषण गरेर मात्र निष्कर्षमा पुग्नु उचित हुने कुरा जानकारी गराउन चाहन्छु ।’

मन्त्री पोखरेलले सेनालाई प्रभावकारी बनाउँदै संरचनामा समयानुकुल सुधार गर्न सकिने बताए । ‘भविष्यमा प्रविधिको विकाससँगै सेनाको संरचनामा समयानुकुल परिवर्तन गर्न सरकार सकारात्मक छ भन्ने कुरा जानकारी गराउन चाहन्छु,’ मन्त्री पोखरेलले भने ।