जनकपुरधाम – अविरल वर्षापछि आएको बाढी र डुबानबाट ग्रस्त २ नम्बर प्रदेशका सबै जिल्लामा राहतका लागि प्रदेश सरकारले १०/१० लाख रुपैयाँ बजेट पठाउने निर्णय गरेको छ ।

प्रदेश सरकार मन्त्रिपरिषद्को शनिवार बसेको आकस्मिक बैठकले राहतका लागि बजेट पठाउने  निर्णय गरेको हो ।

प्रदेश सरकारको बजेटबाट आवश्यकताअनुसार त्रिपाल, खाना लगायत सामग्री खरिद गरेर उपलब्ध गराइने छ । प्रदेश सरकारले बाढी पहिरोबाट ज्यान गएका व्यक्तिका परिवारलाई राहतस्वरुप ३/३ लाख रुपैयाँ दिने निर्णय गरेको छ ।

बाढी प्रभावित क्षेत्रमा उद्धार र राहतको काम गर्न हेलिकप्टर, सेना, प्रहरी, सशस्त्र प्रहरी लगायतलाई परिचालन गरिदिन प्रदेश सरकारले संघ सरकारलाई आग्रह समेत गरेको छ ।

बाढी, डुबान र जलमग्न भएका कारण प्रदेशका अधिकांश जिल्ला प्रभावित भएका छन् ।