जनकपुरधाम – भारतीय पक्षले दशगजाको सिमानमा बनाएको तटबन्धको २ वटा ढोका खोलेपछि रौतहट सदरमुकाम गौरमा पानीको सतह घटेको छ ।

‘भारतीय पक्षले आफ्नो क्षेत्रमा बनाएको तटबन्धको २ वटा ढोका खोलेको जानकारी हामीले पाएका छौं,’ रौतहटका प्रमुख जिल्ला अधिकारी किरण थापाले भने, ‘त्यहाँ हाम्रो मान्छे हुने कुरा पनि भएन तर २ वटा ढोका खोलेका कारण पानीको निकास भएपछि अहिले स्थिति सामान्य बन्दै गएको छ ।’ 

भारतले दशगजा क्षेत्रको आफ्नो भू–भागमा लक्ष्मीनियाँदेखि बैगिर्नियासम्म ठूलो उचाइको तटबन्ध बनाएका कारण गौरसहित विभिन्न भू–भाग डुबानमा परेको थियो ।

अहिले आइतवार बिहानको समयमा गौरको पानीको निकास भएका कारण घुँडा मुनि पानी आएको तथा मानिसहरू सडकमा आवागमन गर्न सक्ने स्थिति देखिएको प्रजिअ थापाले बताए ।

स्थिति सामान्य हुँदै गएको भएपनि सडकमा सवारी साधन आवागमन हुन सक्ने स्थिति नभएको उनले बताए । फसेका मानिसहरूको उद्धारका लागि हेलिकप्टर वा सवारी साधन गुडाउने अवस्था नभएकाले समस्या भइरहेको उनले बताए । 

भएका केही डुंगाहरूको मद्दतले बाढीमा फसेका केही मानिसका स्थानीय सुरक्षाकर्मीको टोलीले उद्धार गर्न सफल भए पनि सयौं मानिसहरूलाई उद्धारको खाँचो रहेको बताउँदै प्रजिअ थापाले भने, ‘स्थानीय तहका जनप्रतिनिधिसँग सहकार्य तथा समन्वय गरेर सुरक्षाकर्मीको उद्धार टोलीले उद्धारको कामलाई तीव्रता दिएको छ ।’

स्रोत साधनको अभावमा उद्धार कार्यमा कठिनाई भइरहेको उनले बताए ।

यता रौतहटकै गढीमाई नगरपालिका वडा नम्बर ६ को धर्मपुर टोलका २ सय ५० घर परिवार अझैसम्म बाढीमा फसेको त्यस क्षेत्रका प्रदेश सभा सदस्य योगेन्द्र नारायण यादवले बताए । 

प्रदेश नम्बर २ को भुमि ब्यबस्था, कृषि तथा सहकारी राज्यमन्त्री समेत रहेका यादवका अनुसार रौतहट जिल्लाकै २ वटा ठूलो नदीहरू बाग्मती र लाल बकैया नदीको टापु बनेको धर्मपुरमा फसेका मानिसहरूको उद्धार कार्य हालसम्म भएको छैन । 

त्यहाँ आकाश मार्ग भएर हेलिकप्टरमार्फत् मात्रै उद्धारको कार्य हुने भएकाले हेलिकप्टरको व्यवस्थापन आवश्यक रहेको राज्यमन्त्री यादवले बताए ।

प्रदेशका ८ वटै जिल्लामा बाढी आएको भए पनि सबैभन्दा बढी क्षति रौतहट जिल्लामा भएको तथा आइतवार बिहानसम्म पनि हजारौं मानिसहरू फसेकाले उद्धारसँगै राहत सामग्री वितरण गर्न आवश्यक रहेको औल्याउँदै राज्यमन्त्री यादवले भने, ‘जुन–जुन ठाउँसम्म हेलिकप्टरमार्फत् पनि कम्तिमा खानेकुरा खसाउन आवश्यक छ, नत्र खानपिन विना पनि मान्छे मर्ने स्थिति आउन सक्छ ।’