काठमाडौं– बिहीवारदेखि परेको अविरल वर्षाका कारण मुलुकभरका अधिकांश सडक अवरुद्ध भएका छन् । अत्यधिक वर्षा र त्यसपछिको बाढीपहिरोका कारण अधिकांश सडक अवरुद्ध भएका हुन् ।

सडक विभागका अनुसार राष्ट्रिय सडकहरूमा त्रिभुवन राजपथ देखि विपि राजमार्गसम्मका ८ वटा सडक अवरुद्ध भएका छन् । काठमाडौं–वीरगन्ज जोड्ने ‘त्रिभुवन राजपथ’को बागझोरा र सिमभन्ज्याङमा बाढीले सडक कटान गरेपछि सडक अवरुद्ध बनेको छ ।

त्यस्तै काभ्रेदेखि महोहत्तरी बर्दिवास जाने विपी राजमार्गको नेपालटार र खुर्कोटमा सडक अवरुद्ध भएको र आइतवारदेखि नै सञ्चालनमा आइसकेको सडक विभागका प्रवक्ता अर्जुन सुवालले जानकारी दिए । ‘कटान भएर अवरुद्ध बनेको थियो,’ उनले भने, 'त्यो हिजैदेखि खुलिसक्यो ।' उक्त सडक सडक माथिबाट पहिरो गएका कारण अवरुद्ध बनेको थियो ।

उनका अनुसार मध्यपहाडी लोकमार्गको खुर्कोट र धुर्मीमा, काठमाडौंबाट कुलेखानी हुँदै हेटौंडा जाने सडकको देउराली र कुलेखानीमा अवरुद्ध भएको छ ।

त्यसैगरी बेनी–जोमसोम सडकको घोप्टेभीरमा अवरुद्ध भएको र खुलाउने प्रयास भइरहेको सडक विभागले जानकारी दिएको छ । विभागका अनुसार ओखलढुङ्गा–हर्कपुर सडकखण्ड अन्तर्गत भडारे खोलामा गएको पहिरोका कारण अवरुद्ध भएको छ ।

त्यस्तै काठमाडौंदेखि हेटौंडा जाने वैकल्पिक सडकका रूपमा हेरिएको कान्तिराजपथ र लमजुङको बेशीसहरदेखि मनाङ जाने चामे सडक पनि अवरुद्ध भएकोले खुलाउने प्रयास भइरहेको सडक विभागले जानकारी दिएको छ ।

त्यस्तै महोत्तरीको बर्दिवासमा मब्सी नदीमा भएको पुल समेत बाढीले बगाएको र त्यहाँ बेली ब्रिज जडान भइसकेको सडक विभागले जानकारी दिएको छ ।

विभागका प्रवक्ता अर्जुन सुवालले अन्य कतिपय पुलहरूमा समेत क्षति पुगेको र क्षतिको यकिन विवरण आउन बाँकी रहेको बताए ।

उता नेपाल प्रहरीले साना ठूला गरी विभिन्न १५ स्थानमा सडक अवरुद्ध भएको र त्यसमध्ये तीन स्थानमा सञ्चालनमा आइसकेको जानकारी दिएको छ ।