स्ट्रासबर्ग– जर्मनीका रक्षामन्त्री उर्सुला भन डर लियेन युरोपेली आयोगको अध्यक्षमा निर्वाचित भएकी छन् । 

आयोगको अध्यक्षका लागि मंगलवार भएको मतदानमा उनी झिनो मतका आधारमा निर्वाचित भएकी हुन् । 

साठी वर्षीया उर्सुला ब्रसेल्समा मुख्यालय रहेको युरोपेली आयोगको सर्वोच्च पदमा पुग्ने पहिलो महिला पनि बनेकी छन् । युरोपेली संघमा आवद्ध २८ मुलुकका सरकार प्रमुखले उर्सुलालाई समर्थन गरेका थिए । 

कूल ७ सय ५१ सदस्यीय युरोपेली संसदमा उर्सुलाले २८३ मत प्राप्त गरेकी थिइन् । उर्सुलाले आगामी नोभेम्बर १ देखि कार्यभार सम्हाल्नेछिन् । हाल युरोपेली आयोगको अध्यक्षमा जाँ–क्लाउड जन्कर रहेका छन् । उनको कार्यकाल पाँच वर्षको हुनेछ ।

बहुभाषी एवं सात बालबच्चाकी आमा उर्सुलाले मतदानपछि सांसदहरूलाई सम्बोधन गर्दै भनिन्, 'बेलायतको बहिर्गमन पश्चात् युरोपेली संघका अघिल्तिर ठूला चुनौतीहरू रहेको र मेरो काँधमा महत्वपूर्ण जिम्मेवारी आइपुगेको छ । तैपनि मलाई निर्वाचित गराउनुभएकामा सबैलाई धन्यवाद दिन चाहन्छु ।'

उनले भनिन्, 'हामी सबै मिलेर रचनात्मक कार्य गर्नु पर्दछ, किनभने मेरो सम्पूर्ण प्रयत्न एकीकृत र बलियो युरोप बनाउनेतर्फ नै केन्द्रित हुनेछ ।' 

उर्सुलालाई विजयी गराउन जर्मनीले समर्थन गरेको थियो । यदि उनी पराजित भएकी भए ब्रसेल्सको सर्वोच्च पदका लागि विभिन्न समूहबीच तीव्र र अस्वस्थ प्रतिस्पर्धा हुने अनुमान गरिएको थियो । 
ब्रेक्जिटको मुद्दा चर्को रुपमा उठिरहेका बेला युरोपेली संघका सामुन्ने इटालीको ऋण तथा संघमा आबद्ध हंगेरी र पोल्यान्डबाट सिर्जित युरोपेली मूल्यमान्यता र कानुनमाथिको चुनौतीलाई सम्बोधन गर्नुपर्नेछ ।

Photo : Theguardian