काठमाडौं – आइतवार राति हङकङमा दंगा प्रहरीले विरोधकर्ताहरूमाथि अश्रूग्यास र रबरको गोली प्रहार गरेपछि चरम अव्यवस्था छाएको छ । अव्यवस्थाकै क्रममा लट्ठी बोकेको भीडले मेट्रो स्टेसनमा मानिसहरूमाथि कुटपिट गरेका छन् ।

खारेज भइसकेको सुपूर्दगी सन्धिका विषयमा छाएको राजनीतिक संकटका क्रममा लगातार सातौं सप्ताहान्तमा दशौं हजार मानिसले सडक प्रदर्शन गरिरहेका छन् ।

सामाजिक सञ्जालमा पोस्ट गरिएका फूटेजमा मुख छोपेका अनि सेतो टीशर्ट लगाएका मानिसहरूको समूहले  कालो लुगा लगाएका मानिसमाथि आक्रमण गरे । कालो विरोधको रंग हो । उनीहरूले युएन लङ एमटीआर स्टेसनको

प्ल्याटफर्ममा र रेलको डब्बामा आक्रमण गरेका थिए । त्यस दिनको विरोध प्रदर्शन भएको लगभग एक घन्टापछि यो आक्रमण गरिएको थियो । 

युएन लङमा भएको हिंसापछि ४५ जना अस्पतालमा भर्ना गरिएका थिए । एकजनाको अवस्था निकै गम्भीर छ ।

यस घटनाले आपराधिक समूहहरू पनि राजनीतिक संकटमा सहभागी हुन आइपुगेको त्रास उत्पन्न गरेको छ । हिंस्रक व्यवहारलाई नसहने भनी सोमवार प्रहरीले बयान जारी गरेको छ । यो घटनाको अनुसन्धान गरिरहेको र कसूरदारहरूलाई न्यायको कठघरामा ल्याउने प्रतिबद्धता पनि व्यक्त गरेको छ । 

सीएनएनबाट