बारा - उद्योग वाणिज्य तथा आपूर्तिमन्त्री मात्रिका यादव र नेपालका लागि भारतीय राजदूत मन्जिवसिंह पुरीले मोतीहारी - अमलेखगञ्ज पेट्रोलियम पाइपलाइन परियोजनाको संयुक्त अवलोकन गरेका छन् ।

अवलोकनपछिको सम्बोधनमा मन्त्री यादवले नेपाल-भारतबीच पेट्रोलियम पाइपलाइन बन्नु समृद्धिको आधार रहेको बताए । 'यो पाइपलाइन नेपालको समृद्धिको आधार हो,' यादवले भने, 'इन्डियन आयल कर्पोरेसन र नेपाल आयल निगम दुवैको प्रयासबाट पाइपलाइन संरचना बन्न सफल भएकाले दुवैलाई धन्यवाद दिन चाहन्छु ।'

भारतीय राजदूत पुरीले पनि दुवै देशका आयल निगमहरूको संयुक्त प्रयासका कारण निर्दिष्ट समयभन्दा ८ महिना अघि नै संरचना निर्माण भएकाले दुवै धन्यवादको पात्र रहेको बताएका थिए ।

भारतको मोतीहारीबाट पाइपलाइनमार्फत पठाइएको डिजेल पहिलो पटक शुक्रबार बिहान ९ बजे अमलेखगञ्जमा खसेको थियो । परीक्षणका लागि डिजेलभन्दा पहिला पानी पठाइएको थियो । 

पाइपलाइन निर्माण सम्झौतापछि दुई वर्ष अध्ययनमा खेर गएको थियो । पाइपलाइन निर्माण गर्ने काम २०७४ पुसबाट शुरू भएको थियो । निर्माण शुरू भएको १८ महिनापछि पाइपलाइन निर्माणको काम सम्पन्न भएको थियो । पूर्व निर्धारित समयभन्दा अघि नै सम्पन्न भएको उक्त पाइपलाइन संरचना करीब ७० किलोमिटर लामो छ । नेपालतर्फ ३७ दशमलव २५ किलोमिटर रहेको छ भने भारततर्फ ३२ दशमलव ६५ किलोमिटर रहेको छ ।