काठमाडौँ - नेपाल भ्रमणमा रहेका रूसी महासंघको सर्वोच्च अदालतका अध्यक्ष भ्यासेल्व लेवादेवले मंगलवार प्रधानन्यायाधीश चोलेन्द्र शम्सेर ज.ब.रा. सँग भेट वार्ता गरेका छन् । लेवादेव चार दिनका लागि नेपाल भ्रमणमा रहेका छन् ।

भेटका क्रममा लेवादेवले नेपाल र रुसी महासँघको लामो समयदेखिको सौहाद्रतापूर्ण र सुमधुर सम्बन्धको चर्चा गरेका थिए । उनले नेपालमा संविधान जारी भएर कार्यान्वयनको अवस्थामा रहेकोले यसले नेपालको आर्थिक विकासमा समेत टेवा पुग्ने विश्वास व्यक्त गरे ।

दुई देशको न्यायपालिकाको नेतृत्व तहबाट भएका भेटघाट र भ्रमणले एक अर्काको अनुभवको आदानप्रदानबाट अनुशरण गर्न सक्ने कुराहरु आफ्नो अभ्यासमा अबलम्बन गर्न उनको भनाइ थियो ।

लेवादेवले भने, 'न्यायपालिकाको रणनितिक योजना भर्खरै मात्र सार्वजनिक भएको जानकारी पाउँदा खुसी लागेको छ यसले न्यायपालिकाको प्रणालीगत सुधार गर्दै लैजानेमा म विश्वस्त छु ।'

भेटका क्रममा प्रधानन्यायाधीश राणाले नेपालमा न्यायपालिकाको योजनाबद्ध सुधारका रुपमा रणनीतिक योजना रहेकाले यसको कार्यान्वयनमा जोड दिएको बताए । उनले रणनीतिक योजनामै समग्र न्यायिक सुधार र न्यायिक सुशासनको बिषय प्राथमिकतामा रहेकाले यसको कार्यान्वयन नै प्राथमिकतामा रहेको बताए । राणाले दुई देशबीच भएको कुट्नीतिक सम्बन्ध तथा विगतमा भएका भ्रमण र अनुभव आदानप्रदानले न्यायिक सुधारका लागि सहयोग मिलेको स्मरण गरे । 

प्रधानन्यायाधीश राणाको मैत्रीपूर्ण निमन्त्रणामा रुसी महासंघको सर्वोच्च अदालतका अध्यक्ष लेवादेव तीन सदस्यीय भ्रमणदलको नेतृत्व गर्दै सोमबार काठमाडौँ आइपुगेका थिए ।