स्नान कक्षमा लडेर घाइते साहित्यकार अप्सराको निधन

साउन १३, २०७६

हेटौंडा – मकवानपुरकी लोकप्रिय साहित्यकार अप्सरा तिम्सिनाको आइतवार राति निधन भएको छ ।

स्नान कक्षमा लडेर सामान्य घाइते भएकी ४५ वर्षीया तिम्सिनाको ज्वरो आउने, पेट दुख्ने तथा जिउ गल्ने समस्याका कारण हेटौंडाको चुरेहिल अस्पतालमा भर्ना गरिएको थियो ।


ADVERTISEMENT

थप उपचारका लागि आइतवार नै भरतपुर लगिएकोमा राति उनको निधन भएको पारिवारिक स्रोतले जनाएको छ । 

विभिन्न पत्रपत्रिकामा दर्जनौं फुटकर कविता र कथा प्रकाशित गरेकी तिम्सिनाको ‘नदी किनाराका आभास’ कविता संग्रह र ‘अभ्यन्तर’ कथा संग्रह प्रकाशित छन् । उनी आँचल साहित्य कला पुञ्ज मकवानपुरको अध्यक्ष थिइन् ।

उनको निधनले मकवानपुरको साहित्य क्षेत्रमा ठूलो क्षति भएको साहित्यकारले बताएका छन् । ‘लामो समयदेखि साहित्य क्षेत्रमा लागेकी तिम्सिनाले साहित्य क्षेत्रमा २ वटा गहकिला पुस्तक र सयौं कथा कविता छोडेर अल्पायुमा बिदा हुनुभयो,’ सहकर्मी साहित्यकार भावना तिम्सिनाले भनिन् ।

उनको निधन पत्याउनै नसकिने दुखद् घटना भएको साहित्य संगम मकवानपुरका अध्यक्ष निमेष निखिलले बताए । उनको सोमवारै गोरक्षेश्वर घाट हेटौंडामा दाहसंस्कार गरिने पारिवारिक स्रोतले जनाएको छ । 

साउन १३, २०७६ मा प्रकाशित

प्रतिक्रिया दिनुहोस