काठमाडौं – अफगानिस्तानको राजधानी काबुलमा शनिवार अबेर रात गरिएको आत्मघाती बम विस्फोटमा ६० भन्दा बढी मानिसको मृत्यु भएको छ । करीब १८० जना घाइते भएको बताइएको छ । 

घाइतेहरूलाई अस्पतालमा भर्ना गरिएको छ । मर्नेको संख्या बढ्ने आशंका गरिएको छ । 

काबुलको पश्चिममा रहेको एक विवाह हलमा विस्फोट गरिएको हो । समारोहमा एक हजारजना भन्दा बढी मानिस उपस्थित थिए । 

अफगान गृह मन्त्रालयका प्रवक्ता नुसरत रहीमीले बताएअनुसार, आक्रमणकारीले मानिसहरूको बीचमा गएर विस्फोट गराएको थियो । बिहेको स्टेजनजिक यो घटना भएको थियो । आक्रमणमा अनेकौं बालबालिका समेत मारिएको एक प्रत्यक्षदर्शीले बताए । 

१० दिनअघि मात्र काबुलमा १४ जनाको ज्यान जाने गरी विस्फोट गरिएको थियो । 

अफगानिस्तानमा सेप्टेम्बर २८ मा चुनाव हुँदैछ । अमेरिका र तालिबानबीच वार्ता चलिरहँदा हिंसा पनि बढेको छ । 

एजेन्सी