काठमाडौँ -प्रधानमन्त्री केपी शर्मा ओलीले यही हप्ता सत्यनिरुपण तथा मेलमिलाप आयोग र बेपत्ता छानबिन आयोगमा पदाधिकारीहरू नियुक्त हुन सक्ने बताएका छन् ।

आइतवार प्रतिनिधि सभामा सार्वजनिक महत्त्वका विषयमा सम्बोधन गर्दै ओलीले एक सातामा खाली रहेका दुई आयोगहरूमा पदाधिकारी नियुक्त हुने आफ्नो विश्वास रहेको बताए ।

'प्रमुख आयुक्त लगायत आयुक्तहरूको सिफारिस गर्न सिफारिस समिति निर्माण गरेका छौं,' प्रधानमन्त्री ओलीले भने, 'सिफारिस समिति क्रियाशील छ, यसै हप्ता भित्र सत्यनिरुपण तथा मेलमिलाप आयोग र बेपत्ता छानबिनसम्बन्धी आयोग गठन हुनेछन् भन्ने म विश्वास गर्दछु ।'

संक्रमणकालीन न्यायसम्पादन गर्ने सत्यनिरुपण तथा मेलमिलाप आयोग र बेपत्ता छानबिन आयोग गत वैशाख १ गतेदेखि पदाधिकारी बिहीन छन् । सरकारले पूर्व प्रधान न्यायाधीश ओमप्रकाश मिश्रको नेतृत्वमा पदाधिकारी सिफारिस समिति पनि गठन गरेको थियो ।

प्रतिनिधिसभामा बोल्ने कतिपय सांसदहरूले सिफारिस समितिको पनि म्याद सकिएकाले द्वन्द्वकालमा पीडित भएकाहरूलाई न्याय दिन सरकार उदासीन रहेको आरोप लगाएका थिए ।