काठमाडौं– पत्रकार शालिकराम पुडासैनीको आत्महत्या तथा र पत्रकार रवि लामिछानेको गिरफ्तारीको विषय संसद्‍मा उठेको छ । 

आइतवार बसेको प्रतिनिधि सभा बैठकको शून्य समयमा नेकपाका सांसद ज्ञयराज सुनुवारले पत्रकार पुडासैनीको मृत्यु प्रकरणको छानबिन गरेर सत्य तथ्य पत्ता लगाउन सरकारको ध्यानाकर्षण गराएका हुन् । 

‘शालिकराम पुडासैनीको मृत्युको कारणले एकातिर उनका आफन्तहरूले न्याय माग्दै नाराजुलुस गरेका छन् भने अर्कोतर्फ रवि लामिछाने लगायतको गिरफ्तारीको विषयलाई लिएर कुरा उठिरहेको छ । सत्यतथ्य छानबिन गरिकन सरकारले जनतालाई जानकारी गराओस्,’ सांसद सुनुवारले भने, ‘कोही पनि अपराधी नउम्किउन र निरपराधीहरू गिरफ्तार नपरून् या सजाय नहुन् यसतर्फ सरकार सचेत होस्, हार्दिक अनुरोध गर्न चाहन्छु ।’

सांसद सुनुवारले देशभर बाँदर आतंकले किसानहरू हैरानीमा परेको भन्दै बाँदर नियन्त्रणका लागि सरकारको ध्यानाकर्षण समेत गराए ।