काठमाडौं – रुसमा केही दिनअघि आणविक विकिरण विस्फोटमा परेका मानिसहरूको उपचार गरेका ६० जना चिकित्सकलाई स्वास्थ्य परीक्षणका लागि मस्को लगिएको बताइएको छ । 

तीमध्ये एक चिकित्सकको शरीरमा केसियम–१३७ पाइएको छ । यो रेडियोएक्टिभ आइसोटोप हो र युरेनियम–२३५ को बाईप्रोडक्ट हो । 

न्योनोस्का नामक स्थानमा हतियार परीक्षणका क्रममा साउन २३ गते विकिरण विस्फोट भएको थियो ।

विस्फोट भएको दिन तीनजना पीडितहरू नग्न अवस्थामा पारदर्शी प्लास्टिक ब्यागमा बेरेर ल्याइएका थिए । अर्खान्गेल्स्क क्षेत्रीय अस्पतालमा चिकित्सकहरूलाई ती कामदारहरू कसरी घाइते भए भनी सत्यतथ्य बताइएको थिएन । 

आणविक शक्तिसम्पन्न रकेटको परीक्षण गर्ने क्रममा भएको विस्फोटमा परी पाँचजना रुसी वैज्ञानिकको मृत्यु भएको थियो । अधिकारीहरूले मृतकलाई एक ठाउँबाट अर्को ठाउँमा लग्दा सुरक्षाकवच लगाएको देखिएको थियो ।

न्योनोस्का गाउँका बासिन्दालाई मस्कोका शीर्ष चिकित्सकहरूले स्वास्थ्य जाँच गरेका थिए ।

त्यसको एक दिनपछि अस्पताल पुगेका रुसी जासूसी संस्थाका एजेन्टहरूले घटनासँग सम्बन्धित सबै स्वास्थ्य रेकर्डहरू मेटाइदिएका थिए । 

उक्त अस्पतालमा उपचार गराएका तीनमध्ये दुई पीडित मस्को लैजाने क्रममा विमानस्थल लगिँदै गर्दा बाटैमा मरेका थिए ।

चिकित्सकहरूले सुरक्षा कवच नलगाइकन पीडितको उपचार गरेकाले उनीहरूमा पनि विकिरण सरेको बताइएको छ । 

विस्फोटको घटनामा कुल पाँच रुसी हतियार अनुसन्धानकर्ताहरू मारिएका हुन् । उनीहरूलाई संयुक्त रूपमा अन्तिम संस्कार गरिएको छ । उनीहरूलाई राष्ट्रिय नायकका रूपमा सम्मान दिइएको छ । तर राज्यले यो दुर्घटना कसरी भएको हो भन्ने विषयमा विस्तृत विवरण दिएको छैन । 

न्योनोस्का गाउँनजिक रहेको परीक्षण स्थलमा भएको विस्फोमा घाइते भएका अन्यलाई मस्कोको एक अस्पतालमा उपचार गरिएको विभिन्न सञ्चारमाध्यमले लेखेका छन् । 

एजेन्सी