काठमाडौं – भारत सरकारले कश्मीरलाई विशेषाधिकार दिने धारा ३७० खारेज गर्ने निर्णय लिएपछि पाकिस्तानका प्रधानमन्त्री इमरान खानले आलोचना खेप्नु परिरहेको छ । 

पाकिस्तानको संयुक्त बहुदलीय सम्मेलनले इमरान सरकारमाथि अन्तर्राष्ट्रिय षड्यन्त्र अन्तर्गत कश्मीर बेचेको आरोप लगाएको छ । उनीहरूले सरकार हटाउनका लागि इस्लामाबाद घेर्ने रणनीति बनाएका छन् । 

डन पत्रिकामा छापिएको समाचारअनुसार, सम्मेलनका संयोजक तथा जमीयत उलेमा ए इस्लाम एफका प्रमुख मौलाना फजलुर रहमानले सबै विपक्षी दल इस्लामाबाद जाने निर्णय लिएको बताएका छन् । 

सम्मेलनको बैठकमा ठूला दल पाकिस्तान पीपुल्स पार्टी र पाकिस्तान मुस्लिम लीग–नवाजका नेता पनि उपस्थित थिए । 

संयुक्त संघर्ष समितिले अगस्ट २६ मा मागपत्र लिएर जाने र सम्मेलनको अर्को बैठक अगस्ट २९ मा बस्ने मौलाना फजलले जानकारी दिए । 

उनले भने, ‘विपक्षीहरूले आज अभियान शुरू गरेको छ र सरकारलाई सत्ताच्युत गराएर मात्र यो अभियान टुंगिनेछ ।’

उनले थपे, ‘कश्मीरका विषयमा निर्णय प्रधानमन्त्री इमरान खानले अमेरिकाका राष्ट्रपति डोनल्ड ट्रम्पसँगको भेटघाटकै क्रममा लिएका हुन् भन्ने अहिलेको परिस्थितिले देखाउँछ । भारतले कश्मीरका विषयमा कुनै कदम चालेमा

पाकिस्तान चुप रहने सहमति गरिएको हुनुपर्छ । पाकिस्तानका मानिस र कश्मीरीहरू अन्तर्राष्ट्रिय षड्यन्त्रको शिकार बनेका छन् । सरकार यसमा जिम्मेवार छ । शासकहरूले कश्मीरीहरूको पिठ्युँमा छुरा धसेका छन् ।’

एजेन्सी