काठमाडौं – भारतका विदेशमन्त्री एस जयशङ्कर नेपालको दुईदिने भ्रमणमा आएको विषयलाई लिएर ग्रेटर नेपाल राष्ट्रवादी मोर्चाले त्रिभुवन अन्तर्राष्ट्रिय विमानस्थलमा कालो झन्डा देखाउने कार्यक्रम राखेकोमा अभियन्ता फणीन्द्र नेपाललाई उनकै घरमा नजरबन्द गरिएको छ । 

नेपाल बस्ने घरको ढोकाछेउमा प्रहरी भ्यानसहित बर्दीधारी पाँचजना र सादा पोशाकका चारजना प्रहरी तैनाथ गरी उनलाई अघोषित नजरबन्द गरेका कारण उनले विमानीथलमा कालो झण्डा देखाउन पाएनन् । 

नेपालको संविधानले शान्तिपूर्ण रूपमा विरोध गर्न पाउने अधिकार प्रदान गरेको भए पनि गृह प्रशासनले त्यसको पालना नगरी कायरतापूर्ण व्यवहार देखाएको भन्दै नेपालले सरकारको भर्त्सना गरेका छन् । 

फणीन्द्र नेपालले विज्ञप्ति जारी गर्दै लेखेका छन् :

ग्रेटर नेपाल राष्ट्रवादी मोर्चाले शुरूदेखि नै नेपालको वास्तविक सिमाना टिस्टादेखि सतलजसम्म हो भन्ने कुरा सप्रमाण भन्दै आएको छ भने यो मोर्चा आफ्नो स्थापनाकालदेखि नै नेपाली जनताको स्वाभिमानको रक्षाका निम्ति पनि लड्दै आइरहेको छ । आज यो देशको गृहप्रशासनले शान्तिपूर्ण क्रियाकलाप गर्न पाउने मेरो मानव अधिकारको हनन मात्र गरेको छैन, व्यक्तिका आधारभूत र नैसर्गिक अधिकारलाई प्रहरीका बुटमुनि थिलथिलो पारिदिएको छ । तर मुलुकको अस्मिताको रक्षा गर्न चाहने व्यक्ति प्रहरीको दमनबाट डराउँदैन न उसको विचारलाई प्रहरीको घेरामा राखेर  कैद गर्न सकिन्छ । यदि मलाई थुन्दैमा र मेरो बाटोमा अवरोध पुर्‍याउँदैमा बहुसंख्यक नेपाली जनमानसमा रहेको भारतप्रतिको घृणा कम हुन्छ भन्ने ठानेको छ भने त्यो नेपाल सरकारको सङ्कुचित दृष्टिकोण मात्रै हो । 

नेपाल र भारतबीचको सम्बन्धमा विशाल खाडलहरू छन् र ती खाडल पुर्ने हो भने नेपालले ठूलो जोखिम उठाउन सक्नुपर्छ । ग्रेटर नेपाल राष्ट्रवादी मोर्चाले उठाउँदै आइरहेको नेपालको करिब ६०,००० वर्ग किलोमिटर जमिनबाट भारतले आफ्नो उपनिवेश अन्त्य गर्नुपर्छ भन्ने माग संबोधन नभएसम्म नेपाल र भारतबीच सम्बन्ध सुदृढ हुने कुरै छैन । त्यस्तै २०७२ सालमा आएको अत्यन्त शक्तिशाली भूकम्पपछि हामी नेपाली तङ्ग्रिन नपाउँदै  २०७२–७३ सालमा भारतले नेपालविरुद्ध  लगाएको आर्थिक नाकाबन्दी पूर्णरूपमा गलत थियो भनी नेपाली जनतासमक्ष भारत सरकारले माफी नमागेसम्म नेपाल–भारतबीच सम्बन्ध सुदृढ हुनै सक्तैन ।

आज बिहान ९ बजेदेखि प्रहरी परिचालन गरी मलाई मेरो  निवासमै नजरबन्दको अवस्थामा राखेका कारण भारतीय विदेशमन्त्री एस जयशङ्करलाई कालो झन्डा देखाउने कार्यक्रम सम्पन्न हुन नसकेकोमा मेरो फेसबूक वालमार्फत नै एस जयशङ्करका नाममा कालो झन्डा हल्लाएर तीव्र विरोध जनाउँछु ।