गलकोट – स्कूलबाट घर फर्कदै गर्दा अविरल वर्षासँगै आएको भेलले बगाउँदा मृत्यु भएकी ८ वर्षीया बालिकाको परिवारलाई जिल्ला प्रशासन कार्यालय बागलुङले बिहीवार घरमै पुगेर राहत रकम प्रदान गरेको छ । 

बागलुङ जिल्लाको बडिगाड गाउँपालिका–७ थाम्काका बुद्धिबहादुर परियारको ८ वर्षीया छोरी शर्मिला परियारको भेलले बगाउँदा भदौ १ गते मृत्यु भएको थियो ।

बडिगाडस्थित डाँफेपातल आधारभूत विद्यालय कक्षा २ मा अध्ययनरत शर्मिलाको विपद्का कारण निधन भई शोकमा डुबेको परिवारलाई राहतस्वरुप १ लाख रुपैयाँ प्रदान गरेको जिल्ला प्रशासन कार्यालय बागलुका नायव सुब्बा लोकबहादुर कुँवरले जानकारी दिए ।

विपद्मा जिल्ला प्रशासनद्वारा सहयोग गरिँदै आएको राहतस्वरुपको रकम घरमै पुगेर मृतक शर्मिलाका बुुवा बुद्धिबहादुर परियारलाई हस्तान्तरण गरिएको जिल्ला प्रशासन कार्यालय बागलुङले जनाएको छ ।

स्कूलबाट फर्कने क्रममा मोटरबाटोमा हिँडिरहेकी बालिकालाई ठूलो पानी परेसँगै सडक किनारामा आएको भेलले बगाएर झण्डै ५०० मिटर तल पुर्‍याएको अवस्थामा शर्मिलाको शव फेला परेको थियो ।