डोटी – सुदूरपश्चिम प्रदेशको पहाडी जिल्ला डोटीमा डेंगु रोगबाट १ जनाको मृत्यु भएको छ ।

जिल्लामै पहिलोपटक डेंगु रोगबाट दिपायल सिलगढी नगरपालिका–६ थाप्लाकी ४२ वर्षीया छत्र मलासी ‘छायाँ’को मृत्यु भएको हो ।

लामो समयदेखि टाउको दुख्ने, ज्वरो आउने क्रम नरोकिएपछि थप उपचारका लागि उनलाई कैलालीस्थित मायामेट्रो अस्पतालमा भर्ना गरिएको थियो । 

उपचारका क्रममा उनको मृत्यु भएको र पछि चिकित्सकले डेंगु रोग लागेको बताएको उनका जेठाजु नारद मलासीले बताए । ‘लामो समयदेखि बिरामी भएकाले भारइल ज्वरोको समस्या होला भन्नेमा थियौं, रोग निको नभएपछि कैलालीतर्फ लग्यौं, उपचार गर्दागर्दै मृत्यु भयो, चिकित्सकले डेंगु हो भनेपछि, हामी आश्चर्यचकित भयौं,’ उनले भने ।

जिल्ला बाहिर कहिले नगएकी निज महिलालाई कसरी डेंगु रोग लाग्यो, यो विषयमा जिल्लामा रहेका चिकित्सकसमेत अचम्मित भएका छन् । डेंगु रोग लागेर निज महिलाको मृत्यु भएपछि अहिले उक्त क्षेत्रमा त्रास छाएको स्थानीय बताउँछन् । मृतक मसालीलाई डेंगु र स्क्रप टाइफस गरी २ रोग देखिएको मायामेट्रो अस्पतालका डा. विष्णु जोशीले बताए । ‘मृतकमा डेंगु र स्क्रप टाइफस रोगले धेरै संक्रमण गरिसकेको थियो, उपचार सम्भव भएन र मृत्यु भयो,’ उनले भने ।

जिल्ला अस्पताल डोटीका डा. भुषण मिश्रले भने, ‘एडिज नामको लामखुट्टेको टोकाइबाट यो रोग सर्छ तर डोटीमा अहिलेसम्म पनि उक्त रोगका बिरामी देखिएका छैनन्, हामी नै अचम्ममा परेका छौं ।’ डा. मिश्रका अनुसार एडिज लामखुट्टेको शरीर र खुट्टामा सेता–काला धब्बाहरु हुन्छन् । यसले दिउँसो मात्रै मानिसलाई टोक्दछ भने सफा र स्थिर पानीमा यसले अण्डा पार्ने गर्दछ । यस्ले आफ्नो १४ देखि २१ दिनको जीवनचक्रमा करीब ३०० अण्डा पार्दछ ।

ज्वरो आएका बिरामीलाई एडिज जातको लामखुट्टेले टोकेपछि लामखुट्टेले स्वस्थ मानिसलाई टोक्दा उसलाई पनि डेंगु सर्दछ । लामखुट्टेको कारण भन्दा पनि मानिसको तीव्र बसाइँसराइ र भ्रमणले यो रोग सार्न सहयोग गरिरहेको चिकित्सको दाबी छ ।