सुर्खेत- कर्णाली प्रदेश सरकारका मुख्यमन्त्री महेन्द्रबहादुर शाहीले हरेक व्यक्तिको सुरक्षा नै समृद्धिको पहिलो आधार भएको बताएका छन् ।

आइतबार वीरेन्द्रनगरमा आयोजना गरिएको बृहत विद्यालय सुरक्षा सम्वन्धी विद्यार्थी मैत्री भेला २०७६ नामक कार्यक्रमलाई सम्वोधन गर्दै जबसम्म व्यक्ति सुरक्षित महसुस गर्दैन तबसम्म उसले आफ्नो बुद्धि विवेश प्रयोग गर्न नसक्ने उनले बताए ।

‘जबसम्म हरेक व्यक्ति सुरक्षित हुँदैन तबसम्म उसले सिकेका कुराहरु कार्यान्वयन गर्न सक्दैन ।’ उनले भने, ‘त्यस्तो भएको खण्डमा समृद्धि हासिल गर्न सकिदैन । त्यसैले कर्णाली प्रदेश सरकार सबैलाइ प्राकृतिक विपत्तीबाट सुरक्षित बनाउन चाहन्छ । यसकालागि हामीले कानून बनाइसकेका छौं । सबैसँग सहकार्य गर्दै कर्णालीलाई सुरक्षित बनाएर समृद्धि ल्याउन चाहन्छौं ।’

मुख्यमन्त्री शाहीले सरकारले अब बन्ने सबै संरचना भूकम्परहित हुने बताए । ‘हामीले बनाइरहेका विद्यालय भवनहरु भुकम्प रहित बनाइरहेका छौं ।’ उनले भने, ‘तर हिमाली जिल्लामा सिमेन्ट र सरिया पु¥याउन समस्या हुँदा भौगोलिक कठिनाइका कारण समस्या भएको छ ।’

उनले नेपाली समाज सिद्धान्त बढी अध्ययन गर्ने तर व्यवहारिक प्रयोग नगर्ने तर्फ अग्रसर भएको बताए । कार्यक्रमलाई सम्वोधन गर्दै सामाजिक विकास मन्त्री दल रावलले नेपालमै सबैभन्दा भूकम्पको जोखिममा कर्णाली प्रदेश रहेको बताए । ‘मानवीय चलखेल जुन स्थानमा बढि हुन्छ त्यहि स्थानमा बढी ज्यान जानसक्ने खतरा बढी हुन्छ ।’ उनले भने, ‘त्यस्तो जोखिमलाई क मगर्न यो सम्मेलनले सरकारलाई थप मार्ग निर्देशन गर्ने हाम्रो अपेक्षा छ ।’

दुइ दिनसम्म सञ्चालन हुने यस कार्यक्रममा जापानको माइक्रो हाइस्कुलका १४ जना शिक्षक विद्यार्थी सहित नेपालका १९ जिल्लाबाट विभिन्न ५७ जना विद्यार्थी र २८ जना शिक्षकहरु गरी ८५ जनाको सहभागिता रहेको छ । सम्मेलनमा पूर्व शिक्षा मन्त्री गंगालाल तुलाधर, वीरेन्द्रनगरका नगर प्रमुख देवकुमार सुवेदीलगायतको सहभागिता रहेको थियो ।

कार्यक्रमको प्रमुख उदेश्य विपद सुरक्षाको बारेमा विद्यार्थी शिक्षक तथा सरोकारवालाहरुको चेतना अभिवृद्धि गर्ने मुख्य लक्ष्य रहेको भूकम्प प्रविधि राष्ट्रिय समाज नेपाल एनसेटका कार्यकारी निर्देशक सुर्य नारायण श्रेष्ठले जानकारी दिए ।

‘विपद सुरक्षाको विषयमा अन्य देशहरुमा प्राप्त ज्ञान तथा अनुभवको प्रचार प्रसार गर्ने, यस सम्वन्धी ज्ञान तथा अनुभवहरु विद्यालय विद्यालय बीच आदान प्रदान गर्ने उदेश्य राखेका छौं ।’ उनले भने, ‘भूकम्प र विपद सुरक्षाका उपायहरुबारे नेपाल र अन्य देशका विद्यालयहरु बीच आदान प्रदान गर्ने र विद्यालय सुरक्षा र पूर्वतयारीका बारे साझा लक्ष्य र उदेश्य निर्माण गर्ने रहेको छ ।’