सपा–राजपा एकतामा सकस, स्वार्थ बाझिन थालेपछि अनेक अड्चन

भदौ १६, २०७६

काठमाडौं – एकताका लागि राष्ट्रिय जनता पार्टी (राजपा) र समाजवादी पार्टी (सपा) ले लामो समयसम्म शृंखलावद्ध छलफल चलाइरहेका छन् । 

एकातर्फ अध्यक्षमण्डलमै ६ जना नेता रहेको राजपामा सपासँग एकीकरण गर्ने विषयमा मत बाँझिएको छ भने अर्कोतर्फ एकीकरणपछि आफ्नो राजनीतिक भविष्य दाउमा पर्नसक्ने चिन्ता नेताहरूलाई परेको छ ।


ADVERTISEMENT

राजपामा महाधिवेशनअघि एकता गर्नुपर्ने र महाधिवेशन कुर्नुपर्ने २ धार देखिएको एक नेताले लोकान्तरलाई बताए । 

उनका अनुसार ६ सदस्यीय अध्यक्षमण्डलमा महन्थ ठाकुर, शरतसिंह भण्डारी, राजेन्द्र महतो र महेन्द्रराय यादव सहमति भए तत्काल एकता गरेर अघि बढ्नुपर्ने पक्षमा रहेका छन् भने हालका संयोजक राजकिशोर यादव र अनिल झा भने महाधिवेशनपछि एकता गर्नुपर्ने पक्षमा रहेका छन् ।  

भर्खरै नयाँ शक्ति र संघीय समाजवादी फोरम मिलेर बनेको सपामा भने एकीकरणका विषयलाई लिएर त्यति विवाद नरहेको देखिएको छ । 

प्रमुख प्रतिपक्षी दल नेपाली कांग्रेस कमजोर देखिएको र सत्तारूढ दल नेपाल कम्युनिस्ट पार्टी (नेकपा) को लोकप्रियता सरकार सञ्चालनका क्रममा खस्किरहेका बेला खाली रहेको राजनीतिक स्थान ओगट्ने लक्ष्यका साथ फरक पृष्ठभूमि र संरचना भएका यी २ पार्टी एक हुने हल्ला चलेको वर्षदिनभन्दा बढी भइसक्यो ।

भदौ १२ गते राजधानीस्थित सपाको केन्द्रीय कार्यालयमा बसेको दुवै पार्टीका प्रतिनिधिको बैठकमा अध्यक्ष उपेन्द्र यादवले महन्थ ठाकुर मानार्थ अध्यक्ष रहने गरी एकताको प्रस्ताव पेश गरे ।

ठाकुरपछि डा. बाबुराम भट्टराई पहिलो नम्बरको अध्यक्ष रहने र आफू त्यसपछिको अध्यक्ष रहने गरेर यादवले गरेको प्रस्तावमाथि राजपाले कुनै छलफल गर्न नचाहेको स्रोतले बतायो ।

‘उहाँले पेश गर्नुभएको प्रस्ताव बिल्कुलै अनौपचारिक हो,’ सपाका एक नेताले लोकान्तरसँग भने, ‘अनौपचारिक कुराकानीका क्रममा यसो पनि हुन सक्छ है भनेर प्रस्तुत गर्नुभएको थियो तर त्यही नै हाम्रो प्रस्ताव भएजसरी कुरा बाहिर आयो ।’ आफ्नो तर्फबाट प्रस्ताव गएको विषयमा सपाका नेता रामसहाय प्रसाद यादवले आफू पनि अनविज्ञ रहेको बताउँछन् । 

सपाका नेता गंगानारायण श्रेष्ठले ठोस प्रस्ताव हालसम्म दुवै तर्फबाट नआएको बताए । ‘छलफलका क्रममा विकल्पका विषयमा छलफल हुनु सामान्य हो,’ उनले भने, ‘यही २२ गते सपाको केन्द्रीय कार्यकारिणी बैठक बस्दैछ, सम्भवतः हामीले त्यतिबेला ठोस प्रस्ताव ल्याउन सक्छौं । त्यतिबेलै राजपाले पनि आफ्नो प्रस्ताव ल्याउने सम्भावना छ । त्यसपछि हामी औपचारिक रूपमा दुवै प्रस्तावमाथि छलफल गर्नेछौं ।’

यस विषयमा राजपा अध्यक्ष मण्डलका सदस्य महेन्द्र राय यादवले आफूलाई केही जानकारी नभएको बताए । ‘उताबाट औपचारिक रूपमा केही प्रस्ताव आएको छैन,’ यादवले लोकान्तरसँग भने, ‘प्रस्ताव त एकातिरबाट मात्र आउने होइन नि, हाम्रो पनि प्रस्ताव हुन्छ । अनौपचारिक रूपमा छलफल भएको विषयमा मेरो कुनै टिप्पणी छैन ।’

भदौ १६, २०७६ मा प्रकाशित

प्रतिक्रिया दिनुहोस