एउटै वडाबाट १५ करोडको आलु निर्यात

भदौ २१, २०७६

सल्यान – कुनै बेला जिल्लाकै विकट र दुर्गम मानिने वाफुखोला अहिले करोडौंको आलु निर्यात गर्ने गाउँ बनेको छ ।

बागचौर नगरपालिका–१२ वाफुखोलाबाट यस वर्ष १५ करोड रुपैयाँको आलु निर्यात भएको छ ।


ADVERTISEMENT

आलुखेतीबाट मनग्य आम्दानी हुन थालेपछि यस क्षेत्रका वासिन्दाले अन्नबाली छाडेर आलुखेती गर्दै आएका छन् । वाफुखोलाका ८० प्रतिशत जमिनमा वर्षे आलुखेती गरिँदै आएको छ । आलुखेतीबाट मनग्य आम्दानी हुन थालेपछि किसान व्यावसायिक आलुखेतीतर्फ आकर्षित हुँदै आएका छन् ।

कुनै बेला परिवारको गर्जो टार्न भारतका विभिन्न स्थानमा पुगेर पसिना बगाउँदै आएका वागचौर नगरपालिका–१२ की वाफुखोलाकी कमला वलीले आलुखेती शुरू गरेपछि भारत नगएको बताइन् । ‘२० वर्षसम्म भारतका विभिन्न स्थानमा पुगेर पसिना बगायौं, त्यो छाडेर आलुखेती गरेपछि बर्सेनि ३ देखि ७ लाख बराबरका आलु बिक्री गर्दै आएका छौं,’ उनले भने ।

परम्परागत अन्नबाली लगाउँदा खासै परिवारका आर्थिक अवस्था राम्रो नभएपछि व्यावसायिकरूपमा आलुखेती गर्न शुरू गरेको स्थानीय गणबहादुर वलीले बताए । ‘मेरो १५ रोपनी जग्गा छ, मकै, गहँु लगाउँदा ३ महिनाभन्दा बढी खाना कहिल्यै पुगेन तर अहिले आलुखेतीबाट बर्सेनि ४ देखि ६ लाखसम्म आम्दानी गर्दै आएको छु,’ उनले भने ।

सडक पुगेपछि व्यापारी गाउँमै पुगेर आलु खरीद गर्न थालेपछि किसानमा उत्साहसमेत थपिएको स्थानीय दुर्गाबहादुर वलीले बताए । ‘पहिले आलु लगाउँदा सडक थिएन, आलु बिक्री गर्न धौधौ हुन्छ तर अहिले आलु खरीद गर्न व्यापारी बारीमै आउँछन्, यसले किसानमा थप हौसला थपेको छ,’ उनले भने । – रमेशकुमार वली/रासस

भदौ २१, २०७६ मा प्रकाशित

प्रतिक्रिया दिनुहोस