काठमाडौं – वैवाहिक अंगीकृत नागरिकताका सम्बन्धमा सांसदहरूबीच धारण बाझिएको छ ।

नेपाली नागरिकसँग बिहे गर्ने विदेशीलाई अंगीकृत नागरिकता दिने सम्बन्धमा सांसदहरूले फरक–फरक धारण राखेका हुन् ।

राज्य व्यवस्था समितिको बुधवारको बैठकमा बोल्दै नेकपा सांसद झपट रावलले नेपाली नागरिकसँग बिहे गर्ने विदेशीलाई १०–१५ वर्ष पछि मात्र अंगीकृत नागरिकता दिनुपर्ने धारण राखे ।

एकहातमा सिन्दुर अर्को हातमा नागरिकता गर्न नहुने उनको धारणा छ ।

‘बंगलादेश, भुटान, पाकिस्तान र माल्दिभ्स जस्ता देशमा कम्तिमा पनि १० वर्षको व्यवस्था छ, माल्दिभ्समा धर्म नै परिवर्तन गराइन्छ, भुटानमा बच्चा जन्माएपछि मात्रै नागरिकता दिने कानून छ,’ उनले भने, ‘एक हातमा सिन्दुर अर्को हातमा नागरिकता दिने काम गर्नु हुँदैन ।’

उनकैजस्तै धारण नेमकिपा सांसद प्रेम सुवालले पनि राखे । बिहे गरेको कम्तिमा १५ वर्षपछि नागरिकता दिने व्यवस्था गर्नुपर्ने उनको धारणा थियो । भारतमा ७ वर्षपछि मात्र नागरिकता दिने व्यवस्था रहेको स्मरण उनले गराए ।
राजपाका रामसहायप्रसाद यादवले रावल र सुवालको धारणामा असन्तुष्टि व्यक्त गरे ।

‘विदेशी महिला नेपालमा बिहे गरी बुहारी बनेर आउँदा के असर पर्‍यो ?’ प्रश्न गर्दै उनले भने, ‘७ र २० को कुरा किन आयो ? बहुमत र अल्पमतको खेल नहोस्, राष्ट्रमा उथलपुथल नआओस् ।’

कांग्रेसका देवेन्द्रराज कंडेलले कडा प्रावधानले नेपाल–भारतबीचको सम्बन्धमा असर पुग्ने धारणा राखे ।

कांग्रेसकै मीना पाण्डे र डिला संग्रौलाले यो विषयलाई धेरै नलम्ब्याउन आग्रह गरे ।

नेकपाकी पम्भा भुसालले यस सम्बन्धमा कडा प्रावधान राख्नुभन्दा सीमा सिल गर्नुपर्ने धारणा राखिन् ।

‘भारतीय किसानले नेपालको भूमि मिचेको नभई एसएसबीले हो,’ उनले भनिन्, ‘एक लाख सेना र सशस्त्र प्रहरीलाई सीमानामा राखौं र ठेक्कापठ्टाको काम अरूलाई नै दिऔं ।’

उनको भनाइमा कांग्रेसका देवेन्द्रराज कंडेलले असन्तुष्टि राखे । सीमा सिल गर्न नहुने उनको भनाइ थियो ।