सुर्खेत -नेपालको नवौं राष्ट्रिय राजमार्गको रुपमा चिनिएको मदन भण्डारी राजमार्गको सुर्खेत पश्चिम खण्डको विस्तृत विवरण प्रतिवेदन (डिपिआर)को काम शुरू भएको छ ।

आइतवार सुर्खेतको बराहताल गाउँपालिका बडिचौरदेखि गुटु हुँदै बेनिघाटसम्मको ९४ किलोमिटर सडकखण्डको डिपिआरको काम शुरू गरिएको हो । डिपिआर तयार गर्ने जिम्मा सेल्ट सिइआरसी जिओकम जेभि कुपण्डोल ललितपुरले पाएको छ ।

आयोजनाको डिपिआरको काम करिव ५० दिनमा सक्ने आफ्नो लक्ष्य रहेको भएतापनि बिचमा दशैं तिहार पर्ने हुँदा डिपिआर तयारको काम मंसिर महिनाको पहिलो साताभित्रै सकिने डिपिआर सर्भे इन्जिनियरहरूले बताएका छन् ।

प्रदेश नम्बर १ को झापा जिल्लाबाट शुरू भई सुदुरपश्चिम प्रदेशको डडेल्धुरा जिल्लासम्म पुग्ने मदन भण्डारी राजमार्ग पश्चिम सुर्खेतका ३ स्थानीय तहका लागि लामो एकदमै ठूलो आशा र भरोसाको केन्द्रबिन्दुको रूपमा रहेको देखिन्छ ।

मदन भण्डारी राजमार्गमा अन्य जिल्लमा सडकको मुआब्जा, जग्गा र यता उता भनेर धेरै विवाद भएपनि सुर्खेतमा त्यस्तो समस्या धेरै नभएको सडक डिभिजन कार्यालय सुर्खेतका प्रमुख गुरुप्रसाद अभिकारीले बताए । सुर्खेतमा जम्मा २३२ किलोमिटर दुरी मदन भण्डारी राष्ट्रिय राजमार्गले समेटेको छ । जसमध्ये पश्चिम सुर्खेतका अलि विकट र सडकको पहुँचबाट अलि समस्यामा रहेका ३ स्थानिय तहलाई समेट्ने बडिचौर गुटु बेनिघाट सडकखण्ड पर्छ ।

जुन ९४ किलामिटर रहेको छ । सडक दायाँ बायाँ कम्तिमा २५/२५ मिटरदेखि ६५ मिटरसम्मको रहने पनि प्रमुख अधिकारीले जानकारी दिए ।

कांक्रेविहारलाई विश्वसम्पदासूचीमा राख्नुपर्छ-सांसद रावत

सुर्खेत क्षेत्र नं २ बाट प्रतिनिधिसभा सदस्यको रुपमा रहेका सांसद नवराज रावतले ऐतिहासिक महत्त्व बोकेको कांक्रेविहार क्षेत्रलाई विश्वसम्पदा सूचीमा पार्न आफू लागिरहेको बताए । उनले नेपालबाट उक्त क्षेत्रलाई ११औं नम्बरको रुपमा विश्व सम्पदमा सूचीमा पार्नसके सिंगो कर्णाली प्रदेशमा नै पर्यटकको संख्यामा भारी वृद्धि हुने बताए ।

सांसद रावतले अहिलेको सरकार जनताको गाउँगाउँमा विकास लिएर गएको दाबी गरे । उनले आफूले पनि निर्वाचनको बेला र त्यसपछि वाचा गरेअनुरुप नै सुर्खेत पश्चिमका जनताको आवश्यकता र समस्यालाई ध्यानमा राखेको बताए ।

सांसद रावतले समृद्धिका लागि एकजना मात्रै उफ्रेर सम्भव नभएको भन्दै स्थानीय तहका जनप्रतिनिधि, जनता, राजनीतिक दलका नेता कार्यकर्ता र कर्मचारी सबैको सहकार्य आवश्यक रहेको औँल्याए । निर्वाचनका बेला आफूले पश्चिम सुर्खेतमा सडक, बिजुली आदि समस्या समाधान गर्ने प्रतिबद्धता गरेको स्मरण गराउँदै उनले ति प्रतिबद्धता विस्तारै पूरा भइरहेको बताए ।

‘मैले बरु थोरै बोलेको छु होला तर पुरा गर्नुपर्छ भन्ने मनसाय छ,' उनले भने , ‘२८ वर्ष कुरेका जनताले समृद्धिका लागि अब थारै समय कुर्न सक्छन् ।’

आफ्नो निरन्तरको पहलमा कोहलपुर सुर्खेत १३२ केभि प्रसारण लाइन बन्ने सुखद क्षण भएको बताउँदै उनले स्थानीय तहका जनप्रतिनिधिहरू कुन पार्टी र यो पार्टी भन्दै समय खेर फाल्न नहुने उनको सुझाव थियो । उनले समन्वय र सहकार्यबाट काम गर्न आग्रह गरे ।

जनताहरूले पनि जनप्रतिनिधिको मनपरीतन्त्रलाई खबरदारी गर्नुपर्ने बताउँदै सांसद रावतले कर्मचारीतन्त्रले पनि विकासमा बाधा पुर्याएको दाबी गरे । सांसद रावतले राजमार्गको उक्त खण्डमा पर्ने विवादहरू स्थानीय जनप्रतिनिधि र राजनीतिक दलको रहेको बताएका छन् । उनले मंसिरमा राजमार्गको डिपिआर काम सकिएपछि माघमा वातावरण प्रभाव मुल्यांकन (इआइए) र चैतपछि टेन्डर प्रक्रिया शुरू गरिनुपर्ने बताए ।

आफुले राजमार्गको उक्त खण्डका लागि ४ अर्ब बजेट माग गरेको समेत सांसद रावतले दाबी गरे । स्थानीयलाई सडक निर्माणका बेला मुआब्जाको आश नगर्न आग्रह गर्दै सबै बजेट मुआब्जामा गयो भने विकास सम्भव नहुने बताए ।

बराहताल गाउँपालिकाका अध्यक्ष तेजबहादुर बस्नेतले राजमार्ग बनेपछि आयात मात्र गर्ने परिपाटी बन्द गर्नुपर्ने बताउँदै निर्यात गर्न सकेमा सफलता हासिल हुने बताए । उनले आउने बेला भरिएका र फर्किँदा रित्ता गाडी जाने राजमार्ग बनेमा युवाहरू विदेशिनुपर्ने स्थिति आउने भन्दै उत्पानमूलक र निर्यातमूलक क्षेत्रमा जोड दिनुपर्ने बताए ।

चौकुने गाउँपालिकाका अध्यक्ष धिरबहादुर शाहीले विकासले पछि परेको पश्चिम सुर्खेतमा विकासको मेरुदण्डको रुपमा सडक र विद्युतको जनतामा ठुलो माग रहेको बताए । पञ्चपुरी नगरपालिकाका प्रमुख उपेन्द्र थापाले सडक छिटै निर्माण सम्पन्न हुनुपर्नेमा जोड दिए ।