काठमाडौँ -बुद्ध एयरले शनिवार साँझ नेपालगंजमा संस्कृति, पर्यटन तथा नागरिक उड्ययन मन्त्री योगेश भट्टराईमाथि भएको हुलहुज्जतका बारेमा विज्ञप्ति निकालेरै स्पष्टीकरण दिएको छ ।

स्पष्टीकरणमा मन्त्रीका कारणले मात्र नभइ आक्रोशित भीडका कारणले २४ मिनेट ढिलो उडेको उल्लेख गरिएको छ ।

आक्रोशित समूहका कारण विमानको एकातर्फको वजन बढ्न गई विमान ढल्केको आरोप विज्ञप्तिमा लगाइएको छ ।

हेर्नुहोस् विज्ञप्ति -

श्रीमान् महानिर्देशकज्यू
नेपाल नागरिक उड्डयन प्राधिकरण बबरमहल,काठमाण्डौ

विषयः घटनाको सत्य तथ्य बारेमा।

मिति २०७६ भाद्र २८ गते शनिवारको उडान नं. BHA 406मा माननीय संस्कृति,पर्यटन तथा नागरिक उड्डयन मन्त्री योगेस भट्टराई समेत रहनुभएको थियो सो उडान घटनाको घटनाक्रम तपसिलमा उल्लेख गरिए बमोजिम पाइएको छ।

१) काठमाडौँबाट नेपालगन्जका लागि विमान १६:५० बजे उड्नुपर्नेमा काठमाण्डौंबाट नै २३ मिनेट ढिला भई १७१३ मा उडेको थियो र विमान नेपालगन्जमा १८:०२ मा अवतरण गरेको थियो।

२) काठमाडौँको Buddha Air Flight Operationले नेपालगन्जलाइ दिएको Revised Timeअनुसार नेपालगन्जबाट विमान १८:२५ को सट्टा १८.४० मा उड्नुपर्ने थियो।

३) बुद्ध एयर सँगै जस्तो यति एयरलाइन्सको विमान १७.५३ मा अवतरण गरेर १८:२१ मा उडेको र श्री एयरलाइन्सको विमान १८:३० मा अवतरण गरेर १८:५१ मा उडेपछि हाम्रा यात्रुहरु विमानमा नलगेका कारण असहज महसुस गर्न थालेका थिए। सोही समयमा माननीय संस्कृति,पर्यटन तथा नागरिक उड्डयन मन्त्रीज्यूका सहयोगीले १८:२५ तिर नेपालगन्ज नागरिक उड्डयन प्राधिकरणका प्रमुखमार्फत् फोन गरेर हामी धम्बोजी आइपुग्यौँ भन्ने जानकारी पाएपछि अब मन्त्रीज्यु आइपुगिहाल्ने आशय बुझी हाम्रा एयरपोर्टका कर्मचारी मित्रहरुले यात्रुहरुलाई १८:३० तिर विमानमा बोर्डिङ गर्नुभएको थियो तर त्यसो नभई उहाँहरुले फोनमा जानकारी गराएभन्दा केही ढिला एयरपोर्ट प्रवेश गर्नुभयो।

४) माननीय मन्त्रीज्यू एयरपोर्ट प्रवेश गर्नु पहिला नै सुरक्षाकर्मीहरु कै अगाडि १४-१५ जना यात्रहरुको समूह हाम्रा विमान परिचारिकाहरुले बाहिर ननिस्कन आग्रह गर्दागर्दै आक्रोशित भई विमानबाट १८:४० तिर बाहिर निस्किएर हाम्रा कर्मचारी मित्रहरुसंग वादविवाद गर्न थाल्नुभएको थियो। सो विवाद ६-८ मिनेट जति चलेको थियो।

५) मन्त्रीज्यु १८:५० मा एयरपोर्ट आइपुग्ना साथ बाहिरका उत्तेजित समूह उहाँतिरै फर्केर तपाइँ किन ढिला आउनुभएको,तपाइँले गर्दा हामी सबैले कुर्नुपर्ने हो भनी अझ आकोशित हुनथालेपछि मन्त्रीज्यू चपचाप विमानभित्र चढ्नुभयो र सो समूह मन्त्रीज्यूसंगसंगै विमान भित्र एकैचोटी चढेर एकै ठाउँमा उभिएर ४-५ मिनेटसम्म अझ बढी आक्रोश पोख्न थालेपछि विमानको एकै भागमा धेरै वजन भएकाले विमान समेत ढल्किएको थियो र सो समूहलाई साम्य बनाई विमानको सिटमा बस्न आग्रह गरेर उडान भर्दा अझ ढिला हुन गएको थियो।

६) नेपालगन्जलाइ दिएको Revised Timeअनुसार नेपालगन्जबाट २४ मिनेट ढिला भई १९:०४ मा विमान उडेको थियो।

७) उल्लेखित घटनामा माननीय मन्त्रीज्युका सुरक्षाकर्मी र सहयोगीहरुले देखाएको संयमताका कारण पनि आक्रोसित समूहलाई समयमै साम्य पारी उडान गरिएको थियो।

रुपेश जोशी
निर्देशक,
बजार व्यवस्थापन विभाग
बुद्ध एयर प्रा लि.