मेस्सीमा पूरै निर्भर बार्सिलोना, कसरी जित्ला लिगा ?

असोज ५, २०७६

काठमाडौं – शनिवार राति ला लिगाको यस सीजनमा लियोनेल मेस्सीले पहिलोपटक खेलेका थिए । तर उनको उपस्थितिले बार्सिलोनाको परिणामलाई खासै फरक पारेन । बार्साको यस टोलीमा समस्यै समस्या छन् जसलाई मेस्सी एक्लैले समाधान गर्न सक्दैनन् । 

ग्रानाडासँग २–० को लज्जास्पद पराजय कुनै आश्चर्यको विषय नबन्नुले नै बार्सिलोनाको स्तरमा समस्या आएको देखाउँछ । 


ADVERTISEMENT

ग्रानाडाले बार्सालाई सन् २०१४ पछि हराउनै सकेको थिएन । तर च्याम्पियन्स लीगमा बोरुसिया डर्टमन्डसँग बराबरी खेलेर स्पेन आएको बार्सामा पहिलेको जस्तो धार नै देखिएन । 

केही समयदेखि बार्सिलोना झूर फर्ममा छ र प्रशिक्षक अर्नेस्टो भाल्भेर्देले पनि यसलाई स्वीकार गरिसकेका छन् । 

‘हामीहरू गृहमैदान बाहिर खेल्दा प्रभावकारिता र पोजेजनमा कमी आइरहेको छ,’ उनले शुक्रवार भनेका थिए, ‘यसले हामीलाई घाटा लगाएको छ र बाहिर खेल्दा हामीले चाहेमुताबिकको परिणाम आइरहेको छैन । हामीहरू गृहमैदानमा गरेको राम्रो काम बाहिर गएपछि बिर्सन्छौं । यसलाई हामी परिवर्तन गर्न चाहन्छौं । हामीहरू अझ सबल र निर्णायक हुनुपर्छ ।’

तर हिजो ग्रानाडामा बार्साका खेलाडी सबल पनि थिएनन्, निर्णायक पनि देखिएनन् । ग्रानाडा यस जीतसँगै शीर्ष स्थानमा उक्लेको छ र त्यसका लागि ऊ हकदार पनि हो । मेस्सी अझै पूर्णतया निको भइसकेका छैनन् त्यसैले बेन्चबाट पछि आएर मात्र खेले । 

यसको परिणामस्वरूप बार्साले पहिलो हाफमा कसरी आक्रमणको तानाबाना बुन्ने भन्ने कुरा नै बुझ्न सकेन यद्यपि लुइस सुआरेज र एन्टोइन ग्रीजम्यान पिचमा थिए । 

अनि डिफेन्समा त बार्सा झनै खत्तम थियो र त्यसमा पनि कुनै आश्चर्य मान्नुपर्दैन । 

बार्साले यस सीजनमा गोल नखाएको भनेको मंगलवार डोर्टमन्डसँगको खेलमा मात्र हो । 

ला लिगामा यस सीजनको पाँच खेलमा बार्सिलोनाले नौ गोल खाइसकेको छ । क्लबले ग्रीजम्यानमाथि १२० मिलियन युरो खर्च गर्नुको साटो विश्वस्तरीय डिफेन्डरहरूलाई ट्रान्सफर विन्डोमा किन्नुपर्थ्यो । ग्रीजम्यान अझै पनि बार्सिलोनामा भिजिसकेका छैनन् र उनले गृहमैदान बाहिर एउटा शट पनि टार्गेटमा हानेका छैनन् । 

बार्साले जुनियर फिर्पोका रूपमा लेफ्टब्याक ल्याएको त हो तर उनको अक्षम्य गल्तीका कारण रामोन अजीजले खेल शुरू भएको दुई मिनेट पनि नबित्दै गोल गरिदिए । 

मेस्सी र अन्सु फातीलाई फिर्पो र कार्लेस पेरेजका स्थानमा ल्याइयो तर बार्साले कुनै पनि समयमा बराबरी गर्ला जस्तो पनि देखिएन । खेलभरि उसले टार्गेटमा जम्मा एक शट प्रहार गर्‍यो । 

ग्रानाडाले भने खेलको अन्त्यसम्म आक्रमण गरिरह्यो तर दोस्रो हाफमा बार्सिलोनाले नै उसलाई गोलको उपहार दियो । आर्टुरो भिडालले डी एरियामा हातले बल छेके । 

अनि आल्भारो भादिल्लोले सजिलैसँग पेनाल्टीमा गोल गरे । खेल सकिन २४ मिनट बाँकी भए पनि २–० को लीडलाई उल्ट्याउन बार्सिलोनालाई गाह्रै पर्ने थियो किनकि मिडफील्ड र अट्याक दुवैमा ठूलो असन्तुलन छ र डिफेन्स त अति नै कमजोर छ । 

मेस्सीले उद्धार गर्देलान् कि भनी बार्साका अन्य खेलाडीले आशा गरेका थिए । हुन पनि उनले पहिले पहिले टीमलाई अप्ठ्यारो परेको बेलामा उद्धार गरिदिन्थे । तर उनी पूर्णरूपमा निको नभइसकेकाले खासै केही गर्न सकेनन् । 

बार्सिलोनाले गृहमैदानबाहिर खेल्न बिर्सेको पक्का हो । तर उसले त डिफेन्ड गर्न पनि बिर्सिसकेको छ । 

बार्सिलोना आफ्नो कप्तानप्रति कति निर्भर छ भन्ने कुरा मात्र यो खेलले प्रमाणित गरिदियो । 

गोल डट्कममा प्रकाशित मार्क डोयलको विश्लेषण

असोज ५, २०७६ मा प्रकाशित

प्रतिक्रिया दिनुहोस