काठमाडौं – इजिप्टका सुरक्षाकर्मीहरूले २०० जना सरकारविरोधी प्रदर्शनकारीमाथि आइतवार सुएज शहरमा अश्रूग्यास र गोली प्रहार गरेका छन् ।

राजधानी कायरोको तहरिर स्क्वेयरमा भारी सुरक्षा व्यवस्था मिलाइएको थियो । उक्त क्षेत्र सन् २०११ मा भएको क्रान्तिको केन्द्र थियो । 

पूर्व सैन्य जनरल राष्ट्रपति अब्देल फत्तह अल–सिसीको राजीनामा माग्दै विभिन्न शहरमा प्रदर्शन गरिएको थियो ।

इजिप्टमा सन् २०१३ मा भएको सैन्य कूपछि विरोध प्रदर्शनमा प्रतिबन्ध लगाइएकोले अहिले भएको प्रदर्शन दुर्लभ नै हो । 

तर सामानको मूल्यवृद्धिका विषयमा भएको असन्तुष्टि बढ्दो क्रममा छ । सिसी सरकारले अन्तर्राष्ट्रिय मुद्रा कोषसँग १२ अर्ब डलरको ऋण प्याकेज अन्तर्गत सन् २०१६ देखि सरकारी खर्च कटौती गराएको छ । 

लगभग एक तिहाइ इजिप्टवासीहरू गरीबी रेखामुनि बस्ने गरेको गत जुलाई महिनामा प्रकाशित आधिकारिक आँकडामा देखाइएको छ । 

शनिवार भएको प्रदर्शनमा सुरक्षाबलले अश्रूग्यास, रबरको गोली र धातुको गोली प्रहार गरेको र केही मानिस घाइते भएको एक व्यक्तिले बताए । 

नाम नबताउने अर्का व्यक्तिले अश्रूग्यास निकै बाक्लो भएकाले प्रदर्शनस्थलभन्दा केही किलोमिटर पर रहेको अपार्टमेन्टमा पुगेको बताए ।

एजेन्सी