क्विटो- इक्वेडरमा भड्किएको हिंसा र सरकार विरोधी प्रदर्शनका विषयमा इक्वेडरका राष्ट्रपति र आदिवासी नेताबीच आइतवार पहिलो भेटवार्ता हुने भएको छ । 

राष्ट्रपति लेनिन मोरेनोले हिंसात्मक भिडन्त व्यापक बन्दै गएपछि राजधानीमा कर्फ्यू लगाउनुका साथै सेना परिचालनको आदेश दिएका छन् ।  

स्थानीय सुरक्षा अधिकारीहरूका अनुसार विरोध प्रदर्शनका क्रममा छ जनाको मृत्यु भएको छ भने झण्डै दुई हजार मानिसलाई गिरफ्तार गरिएको छ । प्रदर्शनकारीले शनिवार एउटा टेलिभिजन स्टेशन र अखबारको कार्यालयमा आक्रमण गर्नुका साथै महालेखा परीक्षकको कार्यालयमा आगजनी गरेका थिए ।

राष्ट्रसंघ र क्याथोलिक चर्चले संयुक्त वक्तव्य जारी गरी क्विटोमा आइतवार सरकारसँग वार्ता हुन लागेको जनाएका छन् । 

राष्ट्रपति मोरेनोले इन्धनमा दिइआएको अनुदान कटौती गर्ने घोषणा गरेसँगै देशव्यापी प्रदर्शन शुरू भएको थियो । इक्वेडरले अन्तर्राष्ट्रिय मुद्रा कोषबाट करीब ४ अर्ब २० करोड अमेरिकी डलर ऋण प्राप्त गर्न सम्झौता गरेसँगै तेलमा दिइएको अनुदान कटौती गरेको थियो ।

सरकारले इन्धनमा दिइरहेको अनुदान कटौती गरेसँगै इन्धनको मूल्य दोब्बर वृद्धि भएको छ । 

इक्वेडरका आदिवासी समूहहरूको जनसंख्या करीब १ करोड ७३ लाख छ । अमेजन र एन्डिसका अवसरविहीन समुदायका हजारौं मानिस क्विटोमा विरोध प्रदर्शनका लागि भेला भएका छन् । उनीहरुले इन्धनमा दिइरहेको अनुदान पुनः उपलब्ध गराउन माग गरेका छन् ।