काठमाडौं – विवेकशील दलको अध्यक्षमा मिलन पाण्डे निर्वाचित भएका छन् । मंगलवारदेखि जनकपुरमा शुरू भएको राष्ट्रिय सम्मेलनले पाण्डेलाई अध्यक्षमा निर्वाचित गरेको हो । 

अध्यक्षका अर्का प्रत्यासी शिव थापालाई पराजित गर्दै पाण्डे अध्यक्ष निर्वाचित भएका हुन् । 

अध्यक्षमा पाण्डेसँगै महासचिवमा निर्देश सिलवाल र नीति सचिवमा सञ्जिव भट्टराई निर्वाचित भएको भएका हुन् ।

लोकान्तरसँग कुरा गर्दै पाण्डेले सुसंस्कृत र वैकल्पिक राजनीतिलाई अझ राम्रोसँग अघि लैजाने आफ्नो प्रतिबद्धता रहेको बताए । 'अझ बढी ठोस अभियानमा जोड दिने मेरो नीति रहनेछ,' पाण्डेले भने, 'आम नागरिकलाई छुने खालको अभियान गर्नेमा मेरो जोड रहनेछ ।'

यससँगै विवेकशील नेपाली दलले आगामी निर्वाचन पाण्डेको नेतृत्वमा लड्नेछ । पाण्डेले आफ्नो ध्यान निर्वाचनमा रहने बताए । 

यसबीचमा पार्टीभित्र आर्थिक अनुशासन कायम नभएको आरोप विवेकशीललाई लागेको थियो । पाण्डेले उक्त आरोप आफूविरुद्ध फैलाइएको नियोजित भ्रम भएको भन्दै आन्तरिक अनुसन्धान पनि गरिरहेको खुलासा गरे । 

'म र मेरो टीम पार्टीलाई थप अनुशासित बनाउने दिशातर्फ लैजानेछौं,' पाण्डेले भने, 'यसबीचमा हामीमाथि आरोप पनि आउने काम भयो । यो यद्यपि हामीविरुद्धको नियोजित प्रचार हो । हामीले आन्तरिक रूपमा अनुसन्धान गरिरहेका छौं । यसले हामीलाई थप प्रतिबद्ध बन्न हौसला थपेको छ ।'