रमेश भट्टराई ‘सहृदयी’

आयो मङ्गल यो सुखान्त पलको नाच्दो छ प्राणी यहाँ
हट्दो सङ्कटमा वसन्त ऋतु यो आएर वर्षै नयाँ
बित्ने त्यो इतिहास हो जगतमा सोचौं नयाँ कल्पना
मेरो यो शुभकामना छ सबमा आनन्द चम्कोस् यहाँ । १ ।

    साना बाल रमे सुरम्य धरती हाँस्दो छ नाच्दो जहाँ
    हावा मन्द छ कोइली रुख बसी गाओस् सुरैले यहाँ
    बारीमा बिउ उम्रिए कृषकले खोस्रेर पोखे जहाँ
    मेरो यो शुभकामना छ सबमा आनन्द चम्कोस् यहाँ । २ ।

फुल्दो वृक्ष र पालुवा छ वनमा मौरी डुले हर्षमा
पाखामा रमिता छ हेर उसले पस्क्यो नयाँ सिर्जना
घुम्दो यो युगको छ चक्र यसमा सालौँ बिते सम्झना
मेरो यो शुभकामना छ सबमा आनन्द चम्कोस् यहाँ । ३ ।

    बाँचौँ यो युगको अमूल्य तन हो सौगात हो जिन्दगी
    पृथ्वीमा बलवान् छ यो समय नै फर्कन्न केही गरी
    झोलामा अब लौ न साँच्न सकिने हो शक्ति साँचोपना
    मेरो यो शुभकामना छ सबमा आनन्द चम्कोस् यहाँ । ४ ।

पाक्दो केश झरी नयाँ मनुजको उम्रन्न अर्को तर
त्यो पाखो हर साल फेर्छ उसको आकार त्यो सुन्दर
आशाले मनमा र हर्ष जनमा बोकोस् छ यो भावना
मेरो यो शुभकामना छ सबमा आनन्द चम्कोस् यहाँ । ५ ।
    

छन्द : शार्दूलविक्रीडित