नेपालमा कोभिड १९ को संक्रमण फैलिरहेको बेला रोगविरुद्ध लड्ने सरकारको अभियानलाई सहयोग पुर्‍याउने उद्देश्यले विशाल ग्रुपको सामाजिक उत्तरदायित्व विभाग भीजी फाउन्डेसनले स्वास्थ्य मन्त्रालयलाई अत्यावश्यक मेडिकल सामग्री हस्तान्तरण गरेको छ ।

भीजी फाउन्डेसनले स्वास्थ्यमन्त्री भानुभक्त ढकाल, स्वास्थ्य सचिव यादवप्रसाद कोइराला र अन्य अधिकारीको उपस्थितिमा ५०० थान व्यक्तिगत सुरक्षा उपकरण (पीपीई), २०० थान इन्फ्रारेड थर्मोमिटर र ८ हजार ९५० थान एन९५ मास्क हस्तान्तरण गरेको हो । 

‘फ्रन्ट लाइनमा रहेर सर्वसाधारणको सुस्वास्थ्यका लागि तीव्र गतिमा फैलिरहेको संकटको सामना गरिरहेका चिकित्सक र स्वास्थ्यकर्मीलाई विशाल ग्रुप सम्मान गर्न चाहन्छ,’ विशाल ग्रुपको व्यवस्थापनले भनेको छ, ‘हामीलाई आशा छ, हाम्रो यो सहयोगले स्वास्थ्यकर्मी र सर्वसाधारणलाई केही राहत दिनेछ ।’

महामारीको विषम परिस्थितिमा विशाल ग्रुप देशको साथमा रहेको, स्रोत र सीपको माध्यमबाट देशलाई सहयोग गर्न प्रतिबद्ध रहेको तथा भविष्यमा आवश्यकता र क्षमताअनुसार विस्तार गर्न तत्पर रहेको ग्रुपद्वारा जारी विज्ञप्तिमा उल्लेख छ ।

समाज र देशप्रतिको जिम्मेबारी बहन गर्दै भीजी फाउन्डेसनले निमुखा वर्गलाई खाद्यान्न र काठमाडौं उपत्यकाभित्रका अस्पतालमा स्यानिटाइजर र सर्जिकल मास्क वितरण गर्दै आएको छ ।

‘विशाल ग्रुप कोरोनाको संक्रमण फैलन नदिन नेपाल सरकार चालेका कदमहरूको समर्थन गर्छ । हामी सर्वसाधारण जनतालाई प्रतिबन्ध लकडाउनको पूर्ण पालना गर्न अपिल गर्न चाहन्छौं,’ विज्ञप्तिमा उल्लेख छ ।