पाल्पाको तानसेनस्थित युनाइटेड मिसन अस्पतालको आइसोलेसन वार्डमा उपचार गराइरहेका एक युवकको ज्यान गएको छ। 

कोरोनासँग मिल्दोजुल्दाे लक्षण देखा परेपछि सोमबारदेखि उपचारार्थ भर्ना गरिएका पाल्पा पूर्वखोला गाउँपालिका वडा १ का ४६ वर्षीय पुरुषको मंगलबार दिउँसो ज्यान गएको अस्पतालले जनाएको छ।

उनको मृत्यु कोरोनाकै कारण भए/नभएको पुष्टि गर्न स्वाब संकलन गरी परीक्षणका लागि जनस्वास्थ्य प्रयोगशाला, भैरहवा पठाइएको अस्पतालका प्रशासकीय प्रमुख जीवन भट्टराईले जानकारी दिए । आफन्तले समेत उनमा सास फेर्न समस्या हुने, खोकी लागिरहनेजस्ता समस्या देखिएपछि अस्पताल ल्याएको जनाएका छन्। 

भारतबाट आइतबारमात्र गाउँ फर्केका उनी स्थानीय शम्भु माविको क्वारेन्टिनमा बसेका थिए । शव अस्पतालमै रहेको र रिपोर्ट नआञ्जेल पर्खिने जनाइएको छ। 

पाल्पामा हालसम्म ५ जना पुरुषमा कोरोना संक्रमणको पुष्टि भएको छ। रैनादेवी छहरा गाउँपालिकामा २, निस्दीका २ जना र माथागढी गाउँपालिकामा १ जनालाई कोरोना संक्रमण देखा परेपछि अस्पताल भर्ना गरिएको छ।