प्रधानमन्त्री केपी शर्मा ओलीले नेपाल कम्युनिस्ट पार्टी (नेकपा) भित्रको विवाद निकै पेचिलो बनेको भन्दै अप्रिय स्थिति आउन सक्नेबारे मन्त्रीहरुलाई जानकारी गराएका छन् ।

मन्त्री र राज्यमन्त्रीहरुलाई शनिवार साँझ बालुवाटारमा बोलाएर ओलीले पार्टीको विवाद निकै जटिल बनेको बताएका हुन् ।

‘देशको परिस्थितीबारे बुझिराख्नु भएको छ, पार्टी एकतामा गम्भीर संकट आएको छ । सरकारले जनहित र राष्ट्रियताको पक्षमा काम गरिरहेको समयमा एकपक्षीय दबाब सिर्जना गरेर दुवै पद छाड भन्ने काम भयो । सरकारले के गल्ती गरेको छ मैले पद छाड्ने ?’ प्रधानमन्त्रीको भनाइ उदृत गर्दै एक मन्त्रीले लोकान्तरसँग भने ।

ओलीले आफू पार्टी एकताप्रति प्रतिबद्ध रहेपनि त्यो आफ्नो मात्र वशमा नरहेको बताएका थिए । ‘पार्टी एकता कायम रहनुपर्छ भन्नेमा म दृढ छु, एकता कायम रहने नरहे कुरा साथीहरु(अन्य नेता)मा निर्भर गर्छ । पार्टी फुटने स्थिती नआओस् भन्नेमा म चिन्तित छु,’ उनले मन्त्रीहरूसँगको बैठकमा भनेका थिए ।

ओलीले विश्वासको वातावरण बनोस भन्ने सबै कार्यकर्ताको चाहना रहेको र बन्न सक्छ कि भन्ने संकेत पनि देखिएको भन्दै मन्त्रीहरूलाई आश्वस्तसमेत पार्ने प्रयास गरेका थिए ।

'एकताको वातावरण नबन्दा मैले मात्र चाहेर के हुन्छ ?’ ओलीले पार्टीमा दुर्घटना आउनेतर्फ संकेत गरेको अर्का एक मन्त्रीले बताए ।

‘पार्टी एक नरहन पनि सक्छ तपाइहरुलाई परिस्थितीको बारेमा सबै जानकारी छ,’ ती मन्त्रीले प्रधानमन्त्री ओलीको भनाइ उदृत गर्दै लोकान्तरलाई भने, ‘सरकारले राम्रो काम गर्दा गर्दै पनि पार्टीकै नेताहरु सरकारविरुद्ध लाग्नुभयो ।

ओलीले पार्टी अप्ठेरोमा पर्ने संकेत गरेपछि मन्त्रीहरु घनश्याम भुसाल र वर्षमान पुनले पार्टीलाई बचाउनु पर्ने भन्दै एकताविरोधी कुरा नगर्न आग्रह गरेका थिए । अन्य कतिप्या मन्त्रीले भने सवाल जवाफ गरेनन् । मन्त्रीहरुसँगको भेटअघि प्रधानमन्त्री ओलीले शनिवार साँझ राष्ट्रपति विद्यादेवी भण्डारीसँग भेटवार्ता गरेका थिए ।