सत्तारूढ दल नेपाल कम्युनिस्ट पार्टी (नेकपा) अध्यक्ष पुष्पकमल दाहाल प्रचण्ड, वरिष्ठ नेता झलनाथ खनाल र माधवकुमार नेपालले राष्ट्रपतिविरुद्ध महाअभियोग लगाउने हल्ला निराधार रहेको भन्दै त्यस्तो अफवाहको विश्वास नगर्न राष्ट्रपति विद्यादेवी भण्डारीसँग आग्रह गरेका छन् । 

स्रोतका अनुसार नेकपाका तीनै शीर्ष नेताहरूले आफैले चुनेको राष्ट्रपतिलाई महाभियोग लगाउने हल्लामा कुनै सत्यता नभएको भन्दै स्पष्ट पार्न खोजेका थिए । 

जवाफमा राष्ट्रपति भण्डारीले आफूले पनि त्यसो होला भनेर कल्पना नगरेको बताइन् । उनले नेताहरूलाई पार्टी एकता नतोड्ने गरी सहमतिको बाटो खोज्नसमेत आग्रह गरेकी थिइन् । 

राष्ट्रपति भवन शितलनिवासमा आइतवार भएको भेटवार्तामा नेताहरुले राष्ट्रपति जस्तो सम्मानित पदलाई विवादमा ल्याउने कुनै मनसाय नभएको स्पष्ट गरेका हुन् । प्रधानमन्त्री केपी शर्मा ओलीले शनिवार बालुवाटारमा मन्त्री र राज्यमन्त्रीहरुसँगको भेटमा राष्ट्रपतिविरुद्ध षडयन्त्र भइरहेको बताएका थिए । 

राष्ट्रपतिविरुद्ध आफूहरुले षडयन्त्र गरेको भन्ने प्रधानमन्त्री ओलीको आरोपपछि प्रचण्ड, नेपाल र खनालले राष्ट्रपतिसँग भेट्न समय लिएका थिए । 

‘प्रचण्डले शुक्रवार भएको भेटमा पनि यो कुरा स्पष्ट पारिसक्नु भएको थियो, प्रधानमन्त्रीले आरोप लगाएपछि तीनै जना नेताहरू राष्ट्रपतिलाई भेट्न जानुभएको हो,’ नेपालनिकट एक स्थायी कमिटी सदस्यले भने । 

स्थायी कमिटीमा धमाधम आफ्नो राजीनामा माग्न शुरू भएपछि प्रधानमन्त्री ओलीले आफू र राष्ट्रपतिविरुद्ध षड्यन्त्र भएको भन्दै कुनै पनि हालतमा राजीनामा नदिने बताउँदै आएका छन् । शनिवार साँझ राज्यमन्त्रीसहित सबै मन्त्रीहरूलाई बालुवाटार बोलाएर जुनसुकै अवस्थामा पनि तयार रहन आग्रह गरेका थिए ।