पार्टीभित्रको विवाद उत्कर्षमा पुगेको समयमा सहमतिको प्रयासस्वरूप नेकपा अध्यक्ष एवं प्रधानमन्त्री केपी शर्मा ओलीसँग छलफल गर्न नेकपाका अर्का अध्यक्ष पुष्पकमल दाहाल ‘प्रचण्ड’ बालुवाटार पुगेका छन् । 

जारी स्थायी कमिटी बैठक केही दिनका लागि स्थगित गरेर सहमति खोज्न भन्दै आइतवार पनि ओली र प्रचण्डबीच छलफल भएको थियो ।

सोमवार थप छलफल गर्ने भन्दै आइतवार बैठकबाट उठेका दुई नेताबीच शनिवार कुनै सहमति जुट्न सकेन । 

हिजोको बैठकमा दुवै नेताले सहयोगी राखेर कुरा गरेका थिए । 

महासचिव विष्णु पौडेल र स्थायी कमिटी सदस्य शंकर पोखरेल तथा वर्षमान पुन र जनार्दन शर्मालाई सहमतिका लागि छलफल गर्न आग्रह गरिएको थियो । 

ओली र प्रचण्डबीच सहमति खोज्न भन्दै आजका लागि बोलाइएको स्थायी कमिटी बैठक २४ गते बुधवारसम्मको लागि स्थगित भएको छ ।

असार १० गते शुरू भएको स्थायी कमिटी बैठकमा गत मंगलवार प्रचण्डलगायत शीर्ष नेताहरूले ओलीको राजीनामा माग गरेपछि नेकपा विवाद नयाँ चरणमा प्रवेश गरेको हो ।