ताइवानको एक सरकारी आयोगका प्रमुखको नियुक्तिका विषयमा मतभेद हुँदा मंगलवार सांसदहरूले संसदमै कुटाकुट गरेका छन् । 

विगत दुई हप्तामा दोस्रोपटक सांसदहरूबीच शारीरिक भिडन्त भएको हो । 

आयोगका प्रस्तावित प्रमुख चेन चु संसद्को मेन च्याम्बरमा प्रवेश गर्न लाग्दा उनलाई रोक्न विपक्षी कुओमिन्ताङ (केएमटी) पार्टीका सांसद सत्तारूढ डेमोक्रेटिक प्रोग्रेसिभ पार्टीका सांसदसँग भिडेका थिए । 
 

हातपात हुँदा शीशा फुटेपछि केएमटीका एक सांसदको हात शीशाले चिरिएर अस्पताल पुर्‍याउनुपरेको थियो । दुवै दलका थुप्रै सांसदहरूलाई सामान्य चोटपटक लागेको छ । 

ताइवानको संसदमा विगतमा निकै झैझगडा हुने गरेको थियो । 

चार वर्षअघि त्साई इङ–वेन राष्ट्रपति बनेलगत्तै सुरधार नीति र पेन्सन कटौतीका विषयमा पनि हातपात भएको थियो । तर त्यसपछि संसदमा झैझगडा अलि कम हुन थालेको थियो । 

चेनलाई कन्ट्रोल युआन नामक संस्थाको प्रमुख बनाउन खोजिएको छ । त्यो सरकारका अन्य अंगलाई निगरानी गर्ने अनुसन्धान निकाय हो । 
 

केएमटी उनको नियुक्तिको विपक्षमा छ । नियुक्तिका लागि संसदीय अनुमोदन जरूरी हुन्छ ।