काठमाडौं – आज शुक्रवारबाट दुई नेपाली चलचित्र प्रदर्शनमा आएका छन् ।

आजबाट प्रदर्शनमा आएका चलचित्र हुन्, ‘जात्रै जात्रा’ र ‘वीर विक्रम २’ । यी दुवै सिक्वेल चलचित्र हुन् ।

‘जात्रै जात्रा’

३ वर्षअघि प्रदर्शनमा आएको चलचित्र ‘जात्रा’को सिक्वेल हो, ‘जात्रै जात्रा’ । यो चलचित्रलाई प्रदीप भट्टराईले निर्देशन गरेका हुन् । चलचित्रको कथा पनि प्रदीपले नै लेखेका हुन् ।

पैसा र सुनको कथालाई रोचक ढंगले प्रस्तुत गरिएको चलचित्रमा विपिन कार्की, दयाहाङ राई, रविन्द्रसिंह बानिया, रविन्द्र झा, वर्षा राउत, राजाराम पौडेल, प्रकाश घिमिरे, सोहित मानन्धर लगायतको मुख्य अभिनय छ ।

चलचित्रको निर्माता सिंगे लामा र यज्ञश्वर पौडेल हुन् भने कार्यकारी निर्मातामा रविन्द्र सिंह बानिया रहेका छन् ।

यसअघि बनेको ‘जात्रा’लाई दर्शकले रूचाएका थिए । यस चलचित्रलाई पनि दर्शकले रूचाउने अपेक्षा गरिएको छ ।

चलचित्रले प्रदर्शनको पहिलो दिन राजधानीका मल्टिप्लेक्सअन्तर्गत क्यूएफएक्स चेनमा १९ शो पाएको छ ।

‘वीर विक्रम २’ 

‘वीर विक्रम’को सफलतापछि निर्देशक मिलन चाम्सले चलचित्र ‘वीर विक्रम २’ निर्माण गरेका हुन् । चलचित्रको कथा भने प्रदीप भारद्धाजको हो ।

मित्रताको कथामा निर्मित चलचित्रमा पल शाह, वर्षा शिवाकोटी, नाजिर हुसेन्, बुद्धि तामाङ, देशभक्त खनाल, विनिषा भण्डारी लगायतको मुख्य भूमिका छ ।

नवराज उप्रेतीको छायांकन रहेको चलचित्रलाई वनिष शाहले सम्पादन गरेका हुन् ।

‘वीर विक्रम २’को बुधबार राजधानीको कुमारी हलमा पर्पल कार्पेट प्रिमियर आयोजना गरिएको थियो । जहाँ चलचित्रलाई सुःखद् प्रतिक्रिया मिलेको छ ।

यस चलचित्रलाई पनि मल्टिप्लेक्समा राम्रै शो मिलेको छ । प्रदर्शनको पहिलो दिन चलचित्रले मल्टिप्लेक्स अन्तर्गत क्यूएफएक्स चेनमा १२ शो पाएको छ । 

यी दुवै राम्रा ब्राण्ड र प्रतिक्षित चलचित्र हुन् । दुई चलचित्र एउटै मितिमा प्रदर्शनमा आउँदा भिडन्त पक्का छ ।

अब यी दुई चलचित्रमा कसले राम्रो व्यापार गर्ला ? जवाफ समयको गर्भमा नै छ ।