एजेन्सी- प्रत्येक ठाउँको आ-आफ्नै संस्कृति र पहिचान हुन्छ ।  भारतका केहि ठाउँहरु यस्ता पनि छन् जहाँका सबै मानिसहरु कृषि पेषामा मात्र निर्भर छन् ।

भारतको महाराष्ट्रमा अहमदनगर जिल्लाको रायटे वाघापुर गाउँमा पोला तीहार मनाउने गरिन्छ । जसमा किसानहरुद्धारा आफ्ना घरमा भएका गोरु, साँढेहरुलाई पूजा गर्ने चलन छ । साँढेहरुको पूजा गरेर पक्वानहरु खुवाइन्छ । साथै उनीहरुलाई सुनका गहनाले सजाइन्छ । 

यस पूजामा घरका सदस्यहरु साँढेको पूजा गरेर सुनका गहनाहरु साँढेको टाउकोमा राखेर मन लागेको कुरा माग्ने गर्छन् । वाघापुर गाउँमा सदा झैँ यस वर्ष पनि साँढेको पूजा गरियो । बाबुराव शिन्दे नाम गरेका एक व्यक्तिकी श्रीमती पनि साँढेको पूजा गरिरहेकी थिइन् ।

यो पूजामा उनले यसवर्ष २ लाख २० हजार रुपैयाँको मंगलसुत्रले साँढेलाई सजाएकी थिइन् । उनले पूजा सकेपछि मंगलसुत्रलाई साँढेको टाउकोबाट निकालेर साँढे नजिकै थालीमा राखिन् ।  त्यहिबेला अचानक बत्ति गयो र उनी मैनबत्ती लिन घरभित्र पसिन् । उनी बाहिर आएर मंगलसुत्र राखेको थाली हेर्दा थाली खाली देखिन् । 

उनले डराएर आफ्ना पति बाबु रावलाई बोलाइन् । बाबुरावले आएर हेर्दा साँढेले मंगलसुत्र चपाइरहेको देखेर अचम्ममा परे । उनी आउँदासम्म साँढेले आधा मंगलसुत्र खाइसकेको थियो । 
बाँकि मंगलसुत्रको भाग पाउनको लागि श्रीमान श्रीमतीले ८ दिनसम्म साँढेको गोबरमा सुन खोज्न थाले । तर उनीहरुले केहि फेला पार्न सकेनन् ।

८ दिनसम्म निरिक्षण गर्दा पनि केहि नपाएपछि उनीहरुले साँढेलाई नै पशु डाक्टर कहाँ लिएर गए । पशु चिकित्सक डा. नेनेले साँढेको अप्रेशन गरेर मंगलसुत्र निकाले । मंगलसुत्र साँढेको अमाशयमा भएको डाक्टरले बताए । 

अपरेशन सकेपछि मंगलसुत्र बाबुरावले पनि पाए र साँढेको पनि अहिले स्वस्थ्यमा सुधार भइरहेको छ ।