मधेश प्रदेश सरकारले सशस्त्र द्वन्द्वका क्रममा शहीद भएका सिरहाका ९५ परिवारलाई १ लाख रुपैयाँका दरले आर्थिक सहयोग प्रदान गरेको छ । 

मधेश प्रदेश सरकारको गृह तथा सञ्चार मन्त्रालय र मधेशी शहीद प्रतिष्ठानद्वारा सिरहाको मिर्चैयामा शुक्रवार आयोजित कार्यक्रममा नेकपा माओवादी केन्द्रका नेता तथा पूर्व मन्त्री मात्रिकाप्रसाद यादव, प्रदेश सरकारका गृह तथा सञ्चारमन्त्री भरतप्रसाद साहले शहीद परिवारलाई प्रमाणपत्र र १ लाख रुपैयाँको चेक हस्तान्तरण गरे ।

नेता यादवले संघीय सरकारले जनयुद्धका शहीदलाई सम्मान गर्न नसके पनि मधेश प्रदेश सरकारले जनयुद्ध दिवस र शहीद परिवारलाई सम्मान तथा आर्थिक सहयोग गर्नु स्वागतयोग्य कार्य भएको उल्लेख गरे । प्रदेश सरकारका गृह तथा सञ्चारमन्त्री साहले शहीद परिवारलाई सम्मान गर्न प्रदेश सरकारले कुनै कन्जुस्याइँ नगर्ने बताए ।

प्रदेश सरकारले जनयुद्ध, जनआन्दोलन र मधेश आन्दोलनका शहिद परिवारलाई भरणपोषण गर्न मासिक भत्ता र शहिद परिवारका छोराछोरीलाई छात्रवृत्ति दिन लागेको जानकारी दिए ।

गरीब, विपन्न परिवारका बिरामीहरूलाई उपचारका लागि आर्थिक सहयोग गर्दै आएको बताउँदै मन्त्री साहले जल विद्युत् आयोजनामा शहीद परिवारलाई शेयर सदस्य बनाउने योजना बनाउन लागेको बताए ।