गतहप्ता मात्रै छायाँकन सकिएको दीपेन्द्र के. खनाल निर्देशित चलचित्र ‘के घर के डेरा’ तिहारको छेको पारेर प्रदर्शनमा आउने भएको छ। बुधवार बेलुका राजधानीमा आकस्मिक पत्रकार सम्मेलनको आयोजना गर्दै चलचित्र कात्तिक ४ गतेदेखि प्रदर्शनमा ल्याउने जानकारी दिइयो। 

निर्मात्री शर्मिला पाण्डेसँग मिलेर निर्देशक खनालले निर्माण गरेको चलचित्र ‘परस्त्री’लाई पछाडि सार्दै ‘के घर के डेरा’लाई तिहारमा प्रदर्शन गर्न लागिएको जानकारी दिइएको हो। घोषणाको समयमा ‘परस्त्री’को प्रदर्शन मिति कात्तिक ६ गतेलाई तोकिएको थियो। 

अब ‘परस्त्री’ फागुन १९ मा रिलिज हुनेछ। शर्मीलाले जेठो छोरा दीपेन्द्रको चलचित्रका लागि ‘परस्त्री’को रिलिज डेट सारेको बताइन्। 

‘मैले घोषणाकै समयमा ‘परस्त्री’को रिलिज डेट घोषणा गरेको थिएँ’ कार्यक्रममा शर्मिलाले भनिन्, ‘तर, नेपाली र हिन्दी भाषामा निर्माण भइरहेकाले निर्धारित मितिमा प्रदर्शन गर्न नसकिने भएपछि जेठो छोरा दीपेन्द्र के. खनालको सिनेमाका लागि प्रदर्शन मिति छाडेको हुँ।’ ‘परस्त्री’लाई उनका छोरा सुरज पाण्डेले निर्देशन गरेका हुन्।

‘के घर के डेरा’मा दयाहाङ राई, विपिन कार्की, वर्षा राउत, सुरक्षा पन्त, रविन्द्र झा, लक्ष्मी गिरी, आशान्त शर्मा, प्रभाकर न्यौपानेलगायतको अभिनय छ। चलचित्रमा सिंगे लामाको कथा, महेश दवाडीको पटकथा तथा संवाद, शंकर थापा स्माइलको संगीत, दीर्घ गुरुङको छायांकन र दीर्घ खड्काको सम्पादन छ। युवराज कार्की कार्यकारी निर्माता रहेको चलचित्रको निर्माता शरद श्रेष्ठ, राजीव श्रेष्ठ र किरण महर्जन हुन्।