माओवादी केन्द्रका अध्यक्ष पुष्पकमल दाहाल प्रचण्डले संघीय चुनावपछि विशेष महाधिवेशन आयोजना गरेर एमसीसीको बारेमा विस्तृतमा छलफल गर्ने बताएका छन्।

जारी केन्द्रीय समितिको बैठकमा केन्द्रीय सदस्यले उठाएको जिज्ञासाको जवाफ तेस्रो दिनको बैठकमा दिँदै प्रचण्डले अहिलेको बैठकमा एमसीसीबारे छलफल नहुने बताएका हुन्।

एमसीसी सम्झौताको पक्षमा माओवादी केन्द्रले मतदान गरेपछि नेताहरू नाराणकाजी श्रेष्ठ, देव गुरूङ, गिरिराजमणि पोखरेलले असन्तुष्टि व्यक्त गरेका थिए। त्यसबेला प्रचण्डले केन्द्रीय समितिको बैठकमा छलफल गराउने आश्वासन दिएका थिए। 

स्थानीय चुनाव अघिको बैठकमा प्रचण्डले चुनावपछिको केन्द्रीय समितिको बैठकमा छलफल गराउने भनेर टारेका थिए। अहिले भने उनले विशेष महाधिवेशनमा एमसीसीबारे छलफल गराउने बताएका हुन्।
प्रचण्डले बैठकलाई सम्बोधन गर्दै एमसीसीमा राष्ट्र घात नभएको र व्याख्यात्मक घोषणा ठीक रहेको बताएका छन्। 

त्यसैगरी, अमेरिकाले प्रस्ताव गरेको स्टेट पार्टनरसिप प्रोगाम (एसपीपी)मा सहभागी नहुने निर्णय भएको पनि उनले बताए।

‘पार्टीले चाँडै विशेष महाधिवेशन आयोजना गर्छ। त्यसमा आवश्यकता अनुसार एमसीसी र एसपीपीबारे छलफल हुनेछ। अहिले एसपीपी नगर्ने भनिएको छ। यी सबै विषयमा चुनावपछि छलफल हुन सक्छ’, प्रचण्डले बैठकमा भनेका छन्।