माओवादी केन्द्रका अध्यक्ष पुष्पकमल दाहाल प्रचण्डले रूस र युक्रेन युद्धमा कसैको पक्ष नलिएको दाबी गरेका छन्। 

जारी केन्द्रीय समितिको बैठकलाई बिहीवार सम्बोधन गर्दै उनले माओवादी केन्द्रले रूस–युक्रेन युद्धको पक्ष नलिएको दाबी गरेका हुन्। प्रचण्डले बैठकमा केन्द्रीय सदस्यले उठाएका प्रश्नको जवाफ दिएका छन्।  

‘गठबन्धनमा रुस–युक्रेन युद्धबारे गठबन्धनभित्र गम्भीर ढंगले छलफल भएको छ। हामीले एउटाको पक्ष लिएका छैन। चीनले खुलेआम र भारतले पनि पक्षधरता लिएको छ’, प्रचण्डले भने, ‘सरकारले पनि एउटा पक्ष लियो तर यो मत हामीले गठबन्धनभित्र राखेका छौँ।’

सरकारले रूसको विरोध गरेको छ भने युक्रेनको पक्ष लिएको छ। रूस–युक्रेन युद्धको विषयमा भएका संयुक्त राष्ट्र संघीय निकायमा नेपालले युक्रेनको पक्ष लिएको थियो। यसो गर्दा नेपालको असंलग्न परराष्ट्र नीतिविपरित भएको भनेर टिप्पणी हुने गरेको छ। 

आगामी दिनमा यस्तो नहोस भनेर सरकारलाई खबरदारी गरिएको प्रचण्डले बैठकमा बताएका छन्। 

‘स्वतन्त्र असंलग्न परराष्ट्र नीति अगाल्नुपर्छ। वार्ता र कूटनीतिक माध्यमबाट समस्याको समाधान गरियोस् भनेर भन्नुपर्छ’, प्रचण्डले भने।