सुर्खेत – कर्णाली प्रदेशका सभामुख राजबहादुर शाहीले सहकारीले निर्वाहमुखी ग्रामीण अर्थतन्त्रलाई उत्पादनशील अर्थतन्त्रमा रुपान्तरण गर्न महत्त्वपूर्ण भूमिका खेल्नुपर्नेमा जोड दिएका छन् ।

शनिवार वीरेन्द्रनगरमा जनप्रिय बहुउद्देश्यीय सहकारी संस्थाको साधारण सभाको उद्घाटन गर्दै उनले विकट बस्तीमा गएर जनताको आर्थिक अवस्था माथि उठाउन सहकारीले भूमिका खेल्न सक्नुपर्ने बताएका हुन् । 

‘ग्रामीण क्षेत्रमा अहिले निर्वाह मात्रै गर्ने खाले अर्थतन्त्र छ,’ सभामुख शाहीले भने, ‘त्यसलाई उत्पादन र उत्पादकत्व वृद्धिसँग कसरी जोड सकिन्छ र त्यहाँका जनतालाई आर्थिक रुपमा कसरी बलियो बनाउन सकिन्छ त्यसमा सहकारीले ध्यान दिन जरुरी छ ।’

सहकारीमा धेरै महिला सहभागिता हुने गरेको बताउँदै त्यसले उत्पादनको क्षमता बढाउने उनको भनाई छ । सभामुख शाहीले आउने दिनमा सहकारीको महत्त्व वृद्धि हुने बताए ।

‘सरकारको नीति ३ खम्बे छ । सहकारी, निजी र सरकारी अर्थनीति सरकारको आधार हो,’ उनले भने, ‘उदाहरणका लागि सहकारी हेर्ने राष्ट्रिय योजना आयोगमा छुट्टै डेस्क छ । पन्ध्रौं योजना निर्माणमा सहकारीको पनि सहभागिता हुन्छ ।’ उनले सरकारले सहकारीलाई समृद्धिको प्रतिकको रुपमा लिएको बताए ।

कर्णाली प्रदेश सभामा सरकारले पेश गरेको सहकारी ऐनको व्यापक छलफल भइरहेको बताए । ‘कर्णालीमा कस्तो सहकारी ऐन बनाउँदा यहाँका लागि उचित हुन्छ भन्ने ध्येयका साथ हामीले सहकारी ऐनका लागि सुझाव संकलन गर्न जुम्ला र रुकुममा समितिलाई पठाएका थियौं,’ उनले भने, ‘अहिले ऐन समितिमा छ र चाँडै प्रदेश सभाले सहकारी विज्ञ, सहकारीकर्मीको सुझाव अनुसारको ऐन पारित गर्नेछ ।’

सभामुख शाहीले अहिले देशको अर्थतन्त्रमा सहकारी क्षेत्रको ५ प्रतिशत मात्रै योगदान रहेको बताए । ‘अहिले सहकारीको ५ प्रतिशत मात्र राज्यलाई योगदान छ,’ उनले भने, ‘यसलाई बढाएर एकतिहाई पुर्याउनुपर्छ । व्याजदरमा कमी ल्याउनुपर्छ । उत्पादनशील क्षेत्रमा ध्यान जरुरी छ ।’