विराटनगर- मोरङको रंगेली नगरपालिका- ९ दोहमनाको एक घरमा बाजागाजासहित निक्कै रमाइलो थियो । कोही बेहुलीलाई सिँगार्दै गरेका, कोही बेहुलाको पर्खाइमा थिए । बाहिर बाजागाजा उसैरी बज्दै थियो ।

बेहुलाको पर्खाइमा रहेका बेहुली पक्ष कतिबेला बेहुला आउलान् र विधिअनुसार बिहेको तयारी गरौंला भन्नेमा थिए । बिहेको तयारीमा सबै लागेका थिए । एकैछिनमा बेहुला पक्ष बाजागाजासहित बेहुली लिन आइपुगे । परम्पराअनुसार बेहुलालाई उनीहरुले जग्गेमा लगे । उता बाहिर जन्तीहरू ब्याण्ड पार्टीमा नाच्न थाले । 

जन्तीहरू ब्याण्ड र पार्टीमा रहँदै गर्दा बेहुला आफ्नो विधिअनुसार काम विवाहको कर्ममा थिए । बेहुलीका बुबा आएका पाहुनालाई खानपिन गराउँदै थिए । यो कुनै नाटक होइन, वास्तविक विवाह हो ।  मोरङको रंगेली नगरपालिका वडा नम्बर ९ का दोहमनाकी मनिका ऋषिदेव र रंगेली ५ का छोटु ऋषिदेवको विवाह हुँदै थियो । 

सानो पराले झुपडीमा भएको विवाह निक्कै रमाइलो थियो । आर्थिक अवस्था कमजोर रहेका बेहुली पक्षका परिवारमा विवाहको लागि कसरी खर्च जुटाउने भन्ने समस्याका बीच विवाह हुँदै थियो । बिहेको केही दिन अगाडि मात्र विवाह खर्च एउटा सामाजिक संस्थाले व्यहोर्ने भएपछि मनिकाको परिवार उनको विवाह गरिदिने मनस्थितिमा पुगेका हुन् ।

यसरी जुट्यो खर्च 

२०७१ सालमा स्थापना भएको सवितादेवी अग्रवाल ट्रष्टले बेहुली पक्षको विवाहको खर्च जोहो गरिदिने भएपछि परिवारले यतिको ताम–झामका साथ विवाह गराएका हुन् । 

ट्रष्टले गाउँ घरमा रहेका गरीब तथा अतिविपन्न परिवारलाई सहयोगीको रुपमा काम गर्नै आएको छ । गरीब परिवार भएकै कारण छोरीको विवाह गर्न नसक्ने तथा आर्थिक अभावका कारण समस्या आउन नदिनका लागि सहयोग गर्दै आएको ट्रष्टका अध्यक्ष मदनलाल अग्रवालले बताए । 

आर्थिक अवस्था एकदमै कमजोर रहेको परिवारबाट सहयोगको आग्रह गरिएपछि उनीहरुको अवस्था हेरेर सहयोग गर्ने गरिएको उनले बताए । ट्रष्टले मनिकाको बिहेको लागि आवश्यक पर्ने बेहुली सारी, चुरा, पाउजु, घडी, दाइजोको रुपमा दिइने दराज र बेहुलाका लागि लुगाफाटो तथा केही सामग्री उपलब्ध गराएको थियो । त्यस्तै ट्रष्टले जन्तीका लागि बिहे भोजको खर्चसमेत व्यहोरेको थियो । संस्थाका अध्यक्ष अग्रवालले बिहेमा दाइजोबाहेकका आवश्यक सबै खर्च ट्रष्टले व्यहोरेको बताए ।  

मनिकाको बिहेमा सहभागी हुनको लागि रंगेली नगरपालिका वडा नम्बर ७ का वडा अध्यक्ष रामचन्द्र मण्डलसहित ट्रष्टका सदस्य राजेश बर्मा, स्थानीय समाजसेवी कमल राजवंशी, अनिल महेश्वरी, कैलाश साहलगायत पुगेका थिए ।

ट्रष्टले आर्थिक अवस्था कमजोर भएका परिवारलाई सहयोग गर्ने कार्यक्रमअनुसार यसअघि पनि रंगेलीकै रामे ऋषिदेवकी छोरी सीता ऋषिदेवको समेत विवाह गराइदिएको थियो । आगामी दिनमा पनि यस्ता कार्यक्रमलाई निरन्तरता दिँदै जाने ट्रष्टका अध्यक्ष अग्रवालले बताए ।